Кьурагь райондин администрациядин пресс-къуллугъди хабар гайивал, 20-октябрдиз КIирийрин хуьруьн спортдин школа-интернатда Ватан патал чанар къурбанд авур кьегьалриз эцигнавай обелиск ачухуниз талукьарнавай мярекат кьиле фена.

Дяведин вахтунда Советрин аскерри ва далу пата кIвалахай зегьметкешри къалурай игитвилерикай, акьалтзавай несилриз ватанпересвилин тербия гунин карда педагогрин коллективрин вилик акъвазнавай месэлайрикай Кьурагь райондин кьил Замир Азизова, райондин агъсакъалрин ва ветеранрин советрин председатель Фахрудин Мирзоева ва масабуру гегьеншдиз суьгьбетна.

Школа-интернатдин директор Надир Тагьирова алай вахтунда дуьньяда авай гьаларикай, Ватандин ЧIехи дяведин йисара чи аскеррин кьегьалвилерикай авур доклад мярекатдин иштиракчийри хушдиз кьабулна. Ада гьакIни Ватан патал чанар къурбанд авур игитриз обелиск эцигунин карда куьмекар гайибуруз сагърай лагьана.

Мярекатдин сергьятра аваз школа-интернатда чирвилер къачузвай аялри дяведин йисарикай, СССР-дин Игитрикай манияр лагьана, шиирар кIелна.

Кьурагь райондин администрациядин пресс-къуллугъ