24-октябрдиз Дагъустандин Верховный судди лезгийрин “Садвал” гьерекатдин кьиле акъвазай Назим Гьажиеван ва грекринни римлуйрин жуьреда кьуршахар кьунай чирвилер гузвай тренер Алисултан Омарован чандиз къаст авунай тахсир кутазвай республикадин агьали Султанхан Ибрагьимов азад ийидай къарар кьабулна.
“Лезги газетдиз” Дагъустандин Верховный судда авай чешмеди хабар гайивал, С.Ибрагьимовак са шумуд статьядай тахсир кутунвай. Суддин заседанидин вахтунда ада вич тахсирлуди яз гьисабнач. Уголовный дело присяжный заседателрин коллегиядин иштираквал аваз веревирдна.
Присяжный заседателри кьабулай вердиктдин бинедаллаз С.Ибрагьимов адак тахсир кутазвай вири статьяйрай михьиди яз малумарна ва ам суддин залдай азадна.
Чи корр.
