Дагъустан Республикадин Кьилин везифаяр вахтуналди тамамарзавай Владимир Васильев (адахъ РФ-дин транспортдин министр Максим Соколов, Азербайжан Республикада РФ-дин полномочный посол Владимир Дорохин, РД-дин Халкьдин Собранидин Председатель Хизри Шихсаидов ва жавабдар къуллугърал алай маса ксарни галай) сифте нубатда Кьиблепатан Дагъустандиз — Мегьарамдхуьруьн райондиз мугьман хьуниз политологри, публицистри, блогерри жуьреба-жуьре баянар гузва. Иллаки Владимир Васильеван “Куь патав Россия вич атана” гафариз. Ам Мегьарамдхуьруьн райондин агьалийрихъ галазни гуьруьшмиш хьана, ада абурун дерди-гьалдихъни яб акална.
Эхь, эхиримжи йисар ахьтинбур хьана хьи, Кьиблепатан Дагъустандин экономика, яшайиш, культура вилик тухун михьиз рикIелай ракъурна. Федеральный ва республикадин бюджетрай чи районриз, шегьерриз ахъайзавай пулар хейлин тIимиларна, эцигиз гъиле кьунвай яшайишдин объектарни акъвазарна. Федеральный ва республикадин программайрик, проектрик Кьиблепатан Дагъустандин сад-кьве объект кутаз хьана. Гьатта Ярагъ-Къазмайрин школадин дарамат, Москвадиз са шумудра кхьейла, Владимир Путиназ куьгьне школа авай чIуру гьалдикай хабар гайила, ахпа эцигиз гъиле кьуна. Са рахунни алач, ихьтин татугай гьаларикай талукь ксариз хабар авачиз тушир.
Зи фикирдалди, Владимир Васильеван “Куь патав Россия вич атана” гафарихъ еке ва дерин мана ава. Яни, икьван гагьда вуч хьанатIани хьана, амма гила куь гьакъиндай Россияди къайгъударвал ийида. И къайгъударвилин сифтегьан камни Самур вацIал цIийи муьгъ эцигиз гъиле кьун ва Ярагъ-Къазмаяр-Махачкъала — международный рехъ кьуд зулунинди авун я.
“Россиядин кьиблепад ва Кеферпатан Кавказ патал Дагъустан транспортдин коридор жезва. И жигьетдай чи вилик зурба крар ква. Гьавиляй чна рекьер фад-фад ва, артухан харжияр тавуна, туькIуьрна кIанда. Рехъ физвай чилер 4 млн манатдин чкадал 40 млн манатдихъ маса къачудай хьтин дуьшуьшар хьана кIандач. Муьгъ эцигунихъ ва хъсан рекьерихъ галаз акваз-акваз уьмуьрни хъсанвилихъ дегиш жеда”, — лагьана В.Васильева.
Россиядин Гьукуматдихъ кьиблепад вири хилерай вилик тухуниз талукь еке планар ава. Кеферпатан Кавказдин Стратегиядин проектдин бинедаллаз Кьиблепатан Дагъустанда Каспийдин транспортдинни логистикадин комплекс арадал гъидайвал я. Муькъуьн бинеда сифтегьан къван эцигдай вахтунда РФ-дин транспортдин министр М. Соколова лагьана: “Им Азербайжандинни Россиядин арада авай гьакIан са муьгъ туш. Ам Евразиядин метлеб авай международный транспортдин коридордин тайин пай я. ГьикI лагьайтIа, Дагъустандин ва Азербайжандин чилерилай транспортдин Кеферпад-Кьиблепад коридор фенва. И рекьерай физвай ва парарни инсанар тухузвай автотранспортдин кьадарарни йисалай-суз гзаф жезва”.
Муьгъ ва гегьеншарзавай рехъ себеб яз Кьиблепатан Дагъустандин агьалийрин яшайишни хъсанвилихъ элкъведа. Им са шакни алачир кар я. Мегьарамдхуьруьн райондин агьалийрихъ галаз гуьруьшмиш хьайилани, В.Васильева гьа и терефдикай ихтилат кудна. Ада агьалийрик секинсузвал кутазвай са-са месэла гьялдайди хиве кьуна ва РД-дин Халкьдин Собранидин Председателдиз, депутатриз, министерствойрин ва ведомствойрин гьакимриз талукь буйругъар гана. Гьа са вахтунда ада лагьана: “Куьне пара тIямлу, виниз тир еридин емишар, салан майваяр битмишарзава, гьа са вахтунда абур маса гудай мумкинвилер авач лугьузва. Хъсан рекьери и месэла гьялиз куьмек гуда. За куь чилел битмишарнавай инжил тIуьна. ГъвечIиди тиртIани, ам пара дадлуди тир. Ихьтин ширин няметар гьасилун патал зегьмет чIугвазвай квез баркалла”.
РД-дин Кьилин везифаяр вахтуналди тамамарзавай В. Васильева райондин мулкуна электросетар къайдадиз гъунин ва хуьруьн майишатдин суьрсет гьасилзавай майишатар, чилер, багълар дигидай целди таъминарунин месэлаяр гежел тевгьена гьялунин патахъай талукь министерствойриз буйругъ гана. Инанмишвал ийиз кIанзава, Дагъустан Республикадин экономика, яшайиш, культура вилик тухун патал гьакъисагъвилелди зегьмет чIугвазвай Кьиблепатан Дагъустандин районрин агьалияр, виликдай хьиз, тахайбурун жергейра амукьдач.
Хийир Эмиров
