Ахцегь райондин тамар кьит дагълара Хуьруьгрин там тIебиатдин надир гуьмбетдиз элкъвена гзаф вахтар я. Ина шамагъаждин, верхи, мегъуьн, гъулцин ва дагъдин къиметлу жинсерин маса тарар, аламатдин вирни ава. Эхиримжи йисара Хуьруьгрин тама гьар жуьре мярекатар кьиле физва. Иниз райондай, республикадин маса пипIерайни агьалияр кIватI жезва, медениятдинни чирвилерин, ял ягъунин мярекатар тешкилзава.
И йикъара, Ахцегь райондин кьил Осман Абдулкеримован меслятдалди, РД-дин спортдин туризмдин Федерацияди РД-дин туризмдин ва халкьдин художественный сеняткарвилерин министерстводи куьмек гуналди, Хуьруьгрин тама спортдин туризмдай акъажунар хьана.
Иниз райондин кьил Осман Абдулкеримов, райадминистрациядин ФК-дин, спортдин, жегьилрин ва туризмдин отделдин кьилин пешекар Назиля Исмаилова, туризмдин ва халкьдин художественный сеняткарвилерин министерстводин, МВД-дин, МЧС-дин векилар, духтурар ва, гьелбетда, акъажунра иштиракун патал жегьилар ва абурун тренерар кIватI хьана.
Мугьманар вич Хуьруьгрин хуьряй тир Осман Абдулкеримова къаршиламишна ва тебрикдин келимаяр рахана.
— Къенин мярекатдин гьуьрметлу иштиракчияр! Хуьруьгрин там -им пионеррин гзаф кьадар сейррин шагьид я. Им, гьайиф хьи, эхиримжи 20-30 йисуз михьиз рикIелайни алатнавай хъсан адет я. Къе чна районда спортдин туризмдал чан хкун патал сифте кам къачузва. Гьелбетда, и хъсан кIвалах идалай кьулухъни давамарун герек я, адан агалкьун квелай ва куь гьевесдилай аслу я, — ихьтин гафаралди райондин кьили виридаз сувар мубаракна ва агалкьунар алхишна.
Н.Исмаиловади мярекатдин итижлу программа туькIуьрнавай. Адак манийвилер аваз дагъдин тамуз фин, тамун юкьва авай майдандал волейбол ва футбол къугъун, гьакIни спортдин маса жуьрейрай алакьунар къалурун квай. Аялриз ва жегьилриз тIарвилер тахьун патал пешекарри абур гъавурдик кутуна ва медицинадин, полициядин, МЧС-дин къуллугъчиярни къуллугъда акъвазнавай.
Акъажунра вад дестеди иштиракна, гьар са командадик 4 гадани са руш квай. Абур кIамун винелай чIугунвай кьве канатдилай физвай. Тамашачийри кьатIунайвал, гадаяр и жуьредин акъажунриз хъсан гьазур хьанвай, амма рушарини чпин алакьунар къалурна.
Эхирдай волейбол, футбол къугъвайдалай кьулухъ 1-чка “Ахты-1”, 2-чка “Хрюг”, 3-чка “Леки”, 4-чка “Медики”, 5-чка “Ахты-2” командайриз хьана.
Райондин кьил Осман Абдулкеримова абурув тайин тирвал райадминистрациядин патай гьуьрметдин грамотаяр вахкана ва хъсан, итижлу къугъунрай виридаз сагърай лагьана. Ада и акъажунар тешкилунин карда иштиракай пешекарриз, райондин тешкилатрин векилриз, РД-дин туризмдин ва халкьдин художественный сеняткарвилерин министерстводин инструкторриз кьилди сагърай лагьана.
Дагъдин надир там. КIватI хьанвайбуру, суфрадихъ ацукьна, тамун булахдин цикай самоварда рганвай чаяр хъвайидалай кьулухъ туризмдин ва халкьдин сеняткарвилерин инструкторарни МЧС-дин къуллугъчияр 60 метрдин кьакьанвал авай рагариз акьахна. Пешекарар анриз акьахна эхвичIай тегьердиз аялар еке итиждивди килигзавай.
Мярекатдин иштиракчийриз, иллаки аялриз хъфиз кIанзавачир. Ихьтин итижлуди, рикIел аламукьдайди хьана Хуьруьгрин тама кьиле фейи спортдин туризмдай акъажунар.
