Ахцегь райондин Цуругърин хуьре мини-футболдин майдан ишлемишиз вахкана. Ам туькIуьрун патал 3,4 миллион манат харжна. Ихьтин зурба майдан эцигун патал такьатар “Развитие местных инициатив” программадин сергьятра аваз республикадин бюджетдай, 615 агъзур манат Ахцегь райондин бюджетдай ва 800 агъзур манатни мергьяматлувилин “Просвещение” фондуни чара авуна. Эцигунрин сифте кIвалахар алатай йисан ноябрдин вацра башламишнай.
Ахцегь районда авай футбол ва мини-футбол къугъвадай майданрикай рахайтIа, 2015-йисуз Хуьруьгрин хуьре мини-футболдин майданни авай спортдин комплекс эцигнай. Надир и комплекс РД-дин лайихлу муаллим М.Абдулкеримован тIварунихъ галай “Просвещение” фондунин такьатрихъ эцигнай. Алатай йисуз Ахцегьа яргъивилел 105, гьяркьуьвилел 68 метр алай чIехи майдан алай аямдин истемишунрив кьадайвал туькIуьр хъувунай. А вахтунда и майдандин къимет 14,2 млн манат тир, адакай 8,3 млн манат РД-дин физический культурадин ва спортдин министерстводай чара авунай.
Ахцегь райадминистрациядин ФК-дин, спортдин ва туризмдин отделдин кьилин пешекар Назиля Исмаиловади къейдайвал, районда спорт вилик тухуниз лайихлу фикир гузва. Гьа жергедай яз — футболдизни. Мукьвал-мукьвал футболдай гьар жуьре акъажунар тешкилзава. Ахцегьрин, Хуьруьгрин, Цуругърин футболдин майданрал жегьилар датIана тупунал къугъвазва. “Жегьил несил, иллаки гатун каникулрин вахтунда, спортдал машгъул хьунал чна шадвалзава. ИкI абур сагълам уьмуьрдал желб, чIуру крарикай къерех жезва” — лагьана ада.