Дербент районда комбайнердин югъ, хуьруьн майишатдин вилик жергейра авай карханайра гатун кlвалахар физвай гьал ахтармишуналди, Дагъустандин кар алай проектар уьмуьрдиз кечирмишунин сергьятра аваз, “Татляр” агрохолдингда тешкилнавай совещание тухуналди къейдна.
И мярекатра Дербент райондин кьил Мегьамед Желилова, райондин администрациядин кьилин заместитель Сеидмегьамед Бабаева, Дербент районда авай Дагъустан Республикадин Кьилин ихтибарлу кас Яхья Гьажиева, райондин депутатрин Собранидин председатель Мажмудин Семедова, райондин агропромышленный комлексдин управленидин начальник Юсиф Герейханова, хуьруьн майишатдин ва хсуси майишатрин регьберри иштиракна.
Совещание башламишдалди, М.Желилова ва адахъ галайбуру хуьруьн са жерге майишатрал кьил чlугуна.
Икl, “Митаги” агрофирмадин машгьур беседкадик (ина гзаф машгьур инсанар, гьа жергедай яз космонавт Андриановни хьана) райондин кьили агрофирма ва адан мулкар агротуризмадин объектар хьиз ишлемишиз жедайди къейдна.
— Къе “Митаги” агрофирмадин сергьятра агротуризм вилик тухунин патахъай чаз РД-дин Кьил Р.Абдулатипова тапшуругъ ганва, — давамарна ада. — И кlвалахар кьилиз акъудун патал сифте нубатда саки 40 йис тамам хьанвай уьзуьмлухар хкудна кlанзава, ахпа, стlалралди яд гудай къайда ишлемишна, цlийи уьзуьмлухар кухтуна кlанда. Агротуризм — им район вилик тухудай хел я. Икl хьун патал бегьем кlвалахар тамамарна кlанзава. Чи райондихъ и хел вилик тухудай вири шартlар ава.
“Низами” агрофирмадин агалкьунрикай лугьудайла, ада мукьвал вахтара хъсан бегьер гудай, 20 гектарда кутунвай (садни хкат тавуна арадиз атанвай) “Августин” ва ”Молдова” сортарин цlийи уьзуьмлухар къейдна.
“Теркеме” агрофирмада совещанидин иштиракчияр МУП-дин чилерал, гьукуматдинни хсуси амадагвилин сергьятра аваз, кьилдин карчиди салан майвайрин зурба бегьер (къарпузар, халияр, помидорар, истивутар…) гьикl арадал гъанатlа, гьадан шагьидар хьана.
Ахпа абур “Татляр” агрохолдингдиз фена. Ина авай Азад Гьажиеван майишатда техил кlватl хъийиз гьазур хьанвай. Ина райондин кьил Мегьамед Желилов комбайндин рулдихъ ацукьна ва Дербент районда техил кlватl хъувунин серенжемдик кьил кутуна.
Гуьгъуьнлай райондин руководителар, АПК-дин начальник, агрофирмайрин директорар Берекейдин майишатдин белгенриз фена ва ана хуьруьн майишатдин илимрин доктор, Дагъустандин илимрин лайихлу деятель Нариман Алиева зурба майданра кутур уьзуьмлухрихъ галаз таниш хьана.
Яхья Гьажиева мугьманар куьгьне чlерейрихъ гелкъуьнин ва абур жегьил хъувунин къайдайрихъ галаз танишарна. Ахпа ада вичи хъийидай кlвалахрикай ва алай йисуз хьайи агалкьунрикай суьгьбетна. Дербент райондин агропромышленный комплексдин управленидин начальник Юсиф Герейханова райондин руководителдиз вичин кlвалахдин тамам гьахъ-гьисаб авуна.
“Митаги”, “Г. Давыдова”, “Зидьян” агрофирмайрин директорри райондин руководство алай йис уьзуьмлухар патал къулайди хьаначтlани, алатай йисандалай артухни алаз бегьер кlватl хъийидайдахъ инанмишарна.
Совещанидал гьакlни, хъсан алхишар авуналди ва дуьз меслятар къалуруналди, Дербент райондин общественный палатадин председатель Фетуллагь Фетуллаев рахана.
Къагьриман Ибрагьимов
