Гьайиф вахтар

 

Аял вахтар рикIел хкиз,

Вилерикай карагзава.

На лугьуди, накь, аял яз,

Зун куьчеда къугъвазава.

 

ХупI хъсанбур тир а вахтар,

Шадвилелди фена уьмуьр.

ГьалтнатIани четинвилер,

Гьуьрмет-хатур авайди тир.

 

Рушни гада лугьун тийиз,

Вири санал къугъвадай чун.

РикIе авай сирер пайиз,

Дуствилелди рахадай чун.

 

Хуьре демер хьайи чIавуз

Чун паталди сувар жедай.

Кьуьлердайла, гъилерикай

Лап гьа лекьрен лувар жедай.

 

КIвал эцигиз кIан хьайитIа,

Мел ийидай адет авай.

Са хизан хьиз вири санал —

Гьардан патай нуьсрет авай.

 

Диде-буба вилик кутаз,

ЧIехибуруз гьуьрмет авай.

Даим чилел чIугваз зегьмет,

Гьар са хуьруьхъ девлет авай.

 

Дегиш хьанва гила вахтар,

Садвал амач чи арада.

Гьуьрмет-хатур чизмач ерли,

Намус тваз къе кьарада.

 

РикIел хквез аял вахтар,

Чи девирдин гьайиф къвезва.

Гьахъсузвилер аквадай кьван

Куьлягь жезва, зайиф жезва…

«Лезги газетдин» 2022-йисан 9-нумрадай.