Жейриба Аллагьвердиева

Зегьметчи диде

 

Аман диде, я чан диде,

Вун гужариз хайид тирни?

Акьван крар на хиве кьаз,

Ял ядай вахт хьайид тирни?

 

Югъ — кIвалахдал, йиф — кIва­лах­дал,

Вун веледар такваз хьана.

Кьуьд атайла, шад жедай ваз,

Тухдалд хизан акваз хьана.

 

Дяведи чун етимарна,

Вад кас хизан ваз пар хьана.

Йифиз храз гуьлуьт-бегьле,

Вилелни ви накъвар хьана.

 

Колхозда вун хьана кIвенкIве,

Гьар са кIвалах тамамарна.

Звеневой яз, тежез галат,

Кьегьалвилер давамарна.

 

КIула кьуна еке чувал,

НикIера на техил цадай.

Зегьметкеш яз гьар са карда,

Бегьер кIватIдай, нехир хуьдай…

 

Фена вахтар, четинвилер

Тахьайбур хьиз, алатна.

Гьакьван четин девирдай чун

Кьегьалар яз акъатна.

 

Хва ви алим, чIехи доктор,

Руш — муаллим гьуьрмет авай.

Шукур хьурай Сад Аллагьдиз,

Чи зегьметдиз къимет ава.

 

Эвел ктаб бадед тIварцIиз

Багъишна зи стхади.

Кьвед лагьайди — чи дидедиз —

Чи виридан архадиз.

 

Веледрал на чIугур зегьмет

Квахьдайди туш садрани.

И дуьньядал дидед хатур

Хадайди туш садани.

 

Зи дидедин тIвар я Тамум,

Стхадин тIвар — Абдурагьман.

Ругулрикай кьит тир кIвале

Са стха яз рикIин дарман.

 

ЧIехи ваха чи совхозда

Авурди я кIвалахар.

Дидеди хьиз, зегьмет чIугваз,

Хвена ада балаяр.

 

Кьил хкажна къекъвезва вах,

Гьар баладал ийиз дамах.

Чандин сагъвал хьурай вичихъ!

Ам — чи кIвалин чIехи даях.

 

Дидеяр хуьх! — лугьузва за.

Ам — дуьньядин безек я.

Гьар макъамда гьар веледдиз

Анжах диде герек я!

«Лезги газетдин» 2022-йисан 9-нумрадай.