* * *
Диде.
Куьрпе.
Дидедин кьил —
Куьрпедин кафандал:
Гьим — кьил,
Гьим кафан я,
КьатIуз хьун залан я…
* * *
Дустар.
Къе мад са дуст,
Зи куьгьне дуст
Хъфена,
“Зун хъфизва”, — талагьна:
ЦIийи дустар гъиз тахьуй
Зи кьисметдиз,
Аллагь, На…
* * *
Раб.
Акъваз тийиз
Куьзва къе за рапунив,
Зи уьмуьрдин
Акъахнавай чкаяр:
Куьтягь жезвач
СакIани гъал гъамунин…
* * *
КIарабар.
За жув хайи йикъалай,
ЦIай-ялав гуз,
Лигимзава кIарабар:
Гьар далдадик,
Зун гуьзетиз,
Чуьнуьх хьанва
Жегьеннемдин азабар…
* * *
Руьгь.
АвачтIани
Тайин чка беденда,
Руьгь чIехи я рикIелай:
Тазвач ада
Сагьибдин тIвар
Хутахиз и чилелай…
* * *
Алван.
Инсан.
Абур кьведни цуьквер я:
Вахт хьайила,
Тикрариз
“Зун иер я!” —
Алван чиляй экъечIда,
Инсан чилин
Мес-яргъандик экечIда…
* * *
Гъам.
Са цIийи гъам
Гьатна рикIе,
Пака мадни
Залан жеда зун.
Са тIимил кьван эх хъия, Чил:
Гьа къе-пака,
Гьахълу терез —
Мизан жеда зун…
* * *
Рангар.
Руьгьдин ака ифенмаз,
ЦIай туьхуьзва рикIин зи.
ЯтIани зун сефил туш:
РикIи — сура,
Руьгьди — цава
Рангар хуьда Чилин зи…
* * *
Экв.
Йифни жезва,
Экв хъфизвач гурандай —
ТIал ава хура:
Фур хьиз хьана адетдин,
Ам гьахьнай сура…
* * *
ЧIулав булут.
Хъсан хьана аваз вун,
Зи чIулав булут.
АвачиртIа,
Амачир зун:
Кьенвай фадлай,
Хъиткьинна,
Уьмуьрдин барут…
* * *
Йикъар.
Мекьини я,
МичIини я
Йикъар зи:
Пара чIав я хъфена
АцIай вацран далудихъ —
Къуза патаз ракъар зи…
* * *
Къекъвераг.
Акур чIавуз къекъвераг,
Гъилер къанвай,
КIвачер къанвай,
Лакьан хьиз,
За фикирда ягьдикай,
Вилерал чи
Акьалтнавай инсандин…
* * *
Дере.
Дере кьуна къвезва циф,
Чилин циф.
И карди гъизва
Зи рикIел диде:
Ада,
Туьк тваз,
АцIурзавай яргъан хьиз,
ДакIвазва дере…
* * *
Дуьнья.
Михьзава за кьацIай дуьнья,
Лугьун тийиз
“Кагьул я!”:
Зун уьмуьрдиз атанва,
Паквал кIани
Малаикдин цIакул яз…
* * *
ЭкъечI къецел,
Цав я ачух —
Гъед хъуьрезва куьчеда:
Ажеб чIав я,
Чим акъуддай гьиссериз,
Вацран кIеме —
Гуьнеда…
* * *
Туп.
Югъ-къандавай,
Руьгьда цIийи барут цаз,
Артухзава
Вичин къуват тупуни.
ГьакI ятIани перт я чун:
КукIвар жезвач
Чавай пайдах тапунин…
* * *
— Чилни зид туш,
Цавни зид туш.
Бес гьина зун рекьида?
— Вун шаир я,
Ахлад цIарцIиз,
Рекьин тийидай…
* * *
Дуьнья.
Гуьгъуьнаваз физва зун
Къекъверагдин дуьадин,
Дуьнья зи:
Анжах гьа икI
Жеда завай кьисметдиз
Яргъалай кьван
Экв къалуриз,
ДакIардавай женнетдин…
* * *
Лугьуз тахьуй:
“Къе вахт авач,
Зун вав, Аллагь,
Пакамахъ фад агатда:
Югъ малум туш,
КIвачикай чил хкатдай…”
* * *
Къван,
Гекъигайла муькуьбрув,
И къван гзаф агьил я:
Адал рехъди
Физвай шумуд ацукьна,
Дердерик рикI гъафил яз.
* * *
ЦIай.
Зи руьгьдиз цIай,
Дин яз цIийи,
Шалбуз дагъди ракъурна.
Хашни ина
Атана зи кьисметдиз.
ЦIийи варзни
Заз сифте яз
И пак дагъди къалурна…
* * *
Сувар.
Мад са сувар алатна,
Вилера — хъвер,
Кьисметда хер тур,
Киснава зун:
Вахт хтанва патав зи,
Кьисметда шер тур…
* * *
Цав.
Чансузрин рехъ…
Руьгьерин цIиргъ,
Гагь вилик физ,
Гагьни кьулухъ хквезва:
Абур ина
Сагъ беденрихъ къекъвезва…
* * *
Лацувал.
Винелай нек иличай хьиз,
Лацу кьуд пад —
Жив къвазва:
Симиналлай къаргъани
Лацу хьана аквазва…
* * *
Кьве дидедин —
Уьмуьрдинни
Ажалдин —
Ава зун къе арада:
Килигзава
Абур заз
Аялдиз хьиз чарадан…
* * *
Чил.
Цав.
Цавай атай гьар са затI,
“Заз тIар жезва.
РикI дар жезва”, —
Талагьиз,
Чили вичиз къачузва.
Цаву чилин са тIални
Вичиз хьурай лугьузвач…
* * *
Ахвар.
Ахвар язни
Вун зи патав хквемир,
Вун гьакьванни къанва заз.
ХтайтIани,
Ваз зун акван хъийидач:
Ви туькьуьлвал —
Гужлу зегьер хъванва за…
* * *
Тар.
Са мус ятIа тар тир зун.
Къе пеш я са,
ТIекв-тIеквзавай тIурфанри.
ЯтIани зун шехьзавач:
Тар тир чIавуз,
Зи дувулар
Хура хьана Ватандин…
* * *
Рехи жезва.
Зун икI акваз,
Зи Ажалдиз хвеши жезва…
* * *
Четин туш,
Четин туш,
Муьгьуьббатдай
Мусибат жагъурун.
Четин я,
Мусибатдин бахчада,
Муьгьуьббат акIурун…
* * *
Сур.
Суравазни беден зи,
Яд цуз куьне,
Зи тIвар алай къапуна:
За,
Багърияр,
Квез экв гуда
Алемдин са къатунай…
* * *
Чапла гъил.
“Чапла гъилив чуьхуьмир чин.
Адан,
Чир хьухь,
КьацIанва хам”, —
Лугьузва чаз каламри.
За чуьхуьзва:
КьацIанвайтIа,
РикIин патав жедачир ам…
* * *
Рехъ.
Рагъдан.
Ваъ талагьиз
Йигинвилиз къадамрин,
Рагъдандин рехъ
КьатI-кьатIзава инсанди:
Вири вичел чIугвадай
Къуват ава гурандихъ…
* * *
Кузва зун,
Вулкан хьана ифизва.
Зун акурбур,
Куз кичIела,
Чуьнуьх жезва далдайрик,
ЦIаярин цIай —
Рагъни кIвализ хъфизва…
* * *
Цуьквер.
Са цуьк хьтин
Руша цуьквер
Маса гузва куьчедал.
И шикилди
Иширзава гуьгьуьл зи:
Куьче ава
МетIерихъ кьван живеда…
* * *
Ахвар.
ГъвечIи чIавуз
Заз са ахвар аквадай —
Жув дагьардиз аватун.
Гила ерли аквазмач:
Фадлай,
Къван яз,
Дар дагьарда ава зун…
* * *
Руьгь.
За руьгьдин ваъ,
РикIин къайгъу чIугвазва:
Зи Ватандин
Хъверни адаз,
Херни адаз
Аквазва…
* * *
Дин.
Диндиз ваъ,
Имандиз
Икрамзава за:
Ийиз тазва и кар зав,
Пак женнетдиз
Мугьман хьайи иланди…
* * *
Руьгь,
Руьгь патал ваъ,
РикI патал
Эцигда за чан:
РикI —
Хуьруьн нуькI,
Руьгь я
Дурна,
Мекьи хьунни,
Дегишдай Ватан…
* * *
Чил.
Пака кьванни кутур зун
Жуван къайи
Месик, чил:
Кас амач захъ
Вугудай гъил…
* * *
Кьуьд.
На хъуьтIуьзни,
Заз гатфарар хкиз кIанз,
Цуьквер цазва рикIе зи.
Цамир мад:
Вуч тIуьртIани,
Ажалдин
Дад гьатзава сиве зи…
* * *
Ишигъ.
Са мус ятIа,
Ишигъ яз,
Зун и чилел атана.
ИкI тирвиляй дерт ава захъ:
Туьхуьзва зун,
Няс девирдин чIулав чин
Экуь ийиз тахьана…
* * *
Кас.
Зи азиз кас,
Хъфена вун,
Багъишна заз ялгъузвал.
ГьакI ятIани тек туш зун:
Захъ гала зи
Вафалу дуст —
Бахтсузвал…
* * *
Сур.
Суруни,
Тарци хьиз,
Дегишдач чка,
КайитIани азабри:
Тар — дувулрихъ,
Сур галкIанва,
Чилиз фенвай кIарабрихъ…
* * *
ТIебиат.
ТIебиатдив
Зун
РикI михьиз
ЭгечIда:
Ам себеб яз,
Къелемни,
На патахъдиз акIурай,
Дуьз тар хьана,
Ракъинихъди экъечIда…
* * *
Лугьузва за.
Лугьузва за легьзейра,
Кьисметди руьгь,
Чан дарай:
— Есирар я чун вири,
АватIани Ватанда;
ВацIар я чун,
Тунвай кIеви бандара…
* * *
Ажал.
Зун хутахиз къвемир вун,
Зи азиз Ажал —
Зун жув рекье гьатнава:
Амукьдалди,
Вишра хъфин хъсан я
Дуьньядай,
Гьахъ катнавай…
* * *
Вилер.
За вилера,
ТIазватIани кIарабар,
Ишигъ твазвач нахуш тир:
Геж йифериз,
Ширинариз уьмуьр заз,
Хуьруьн куьгьне сурарай
Гьарайзава суркъушди1…
* * *
ЧIулав къван.
Са мус ятIа,
Экуьвилихъ цIигел яз,
Каабадиз
Са чIулав къван аватнай:
Ина адав
Мадни артух
ЧIулаввилер агатна…
«Лезги газетдин» 2022-йисан 26-нумрадай
_________________
