Храхрин хуьр

 

Храхрин хуьр, Храх уба,

Авай вичихъ тарих зурба.

Бул берекат, мублагь чилер,

ТIебиатни гьакьван иер!

Багълар — гузвай булдалд емиш,

Халкьни — чилив хьанвай вердиш.

Гьасилзавай майва, техил,

Мухни гергер, алафни къуьл.

Гьар хизанди чIугваз зегьмет,

Хуьзвай хуьре, кIвале гьуьрмет.

Лезги адет, лезги мехъер,

Къурмишзавай чIехи мелер.

Гьа икI йисар къвез алатна,

Хуьре бирдан къал акъатна.

Миллетчияр хьана пехил,

Къакъудиз кIанз чи хайи чил.

Къвез-хъфизвай гьар са юкъуз,

“Им чун хайи чил я!” лугьуз.

Къарагъна халкь — рикIевай тIал,

Хуьз Ватанни чил, хайи чIал.

Халкьдин кьиле авай Айваз,

Миллетчияр ийиз яргъаз.

Идарайриз арза-ферзе,

Къуват серфна гьа и рекье.

Гьукумдарри авур икьрар

Чун паталди хьана зарар.

Месэладин кьуна эхир:

Маса гана Храхрин хуьр.

Чи хайи кьеб, бубайрин муг,

Тергна михьиз, авуна руг.

Акъудна чун хайи хуьряй,

Багъри Ватан фена гъиляй.

Храхвияр чкIанва къе,

Сад — шегьерда, сад — са хуьре.

Эхиз жедан ихьтин кIвалах?

Вилик ква чи кьурай булах.

Багърияр къакъудна шумуд,

Тергна чи къаст, мурад, умуд.

«Лезги газетдин» 2022-йисан 23-нумрадай.