Женнет  Римиев,

РД-дин культурадин ­лайихлу работник, Кьурагь район, КьепIир

 

Начальникдиз

 

Ришвет патал гъайила гьер,

КIуфукни ви кткида хъвер,

Хкваш лугьуз хъвадай зегьер,

Хьурай ваз дарман, начальник.

 

Къе руфунал акьалтна пи,

Кефиярни къумбар я ви,

Гьар са касдин хъваз на иви,

Гьикьван хьурай мад, начальник?

 

Кесибривай къакъудиз пул,

ЧIугвадач на са чарчел къул,

Гъиз таз жуваз савкьатар бул,

ХупI инсан я и начальник!

 

Чиз амач я дуст, я халу,

Мягькемариз на ваз пару,

Гьа вун хьтинбур кьуна далу,

Яргъал фидан икI, начальник?

 

Ихьтин дуьнья хьана чаз къе

 

Акурди хьиз са пис ахвар,

Жезмач завай лугьуз гафар,

Хквезмач зи мецел чIалар,

Ихьтин дуьнья хьана чаз къе.

 

Хквезмач ван садазни къе,

Гьикьван хьурай зун куь рекье?

Еке парар гьатна хиве,

Ихьтин дуьнья хьана къе чаз.

 

Меркездиз физ-хквезва зун,

Залан я зи гьар са юзун,

Авайди туш ана жузун,

Ихьтин дуьнья хьана чаз къе.

 

Баябан я хайи чилер,

ИчIи жезва къвез-къвез кIвалер,

Низ ахъайин за зи дердер,

Ихьтин дуьнья хьана чаз къе.

«Лезги газетдин» 2024-йисан 16-нумрадай.