Шииратдин рагъ я вун!

 

Зун шаир туш, амма зи рикI экуь я,

Гзаф шад я ви межлисдин гурвилел.

Сулейман, ви район, эхь, чи ери я,

Им зар — дамах, шадвал тушни чи чилел!

 

Къе шаирдин асирни зур хьанава,

Чи несилдиз аквазва вун бахчада.

Им бахт тушни, чун атана гьанава —

Ви тIварунихъ фирягьнавай чкада.

 

Мукьвал-мукьвал зун чи багъдин мугьман я,

Салам гана, кIелзава ваз дуьаяр.

Гьайиф къвезва, вун сурани етим я,

Ви патав гвач гьич са касни багърияр.

 

Вун, Сулейман, мердвилин пак бине я,

Дагъустандин шииратдин рагъ я вун.

Ви халкь патал ви тIвар даим вине я,

Гьакъикъатда, гьардан рикIе  сагъ я вун!

Вун бахчада архайин хьухь ахварик,

Гьамишанда цуьквер жеда ви вилик!

«Лезги газетдин» 2024-йисан 19-нумрадай.