Чи гъилиз и мукьвара Бакуда чапдай акъатнавай саки 200 чиникай ибарат ктаб атанва: “Зи манияр”. Адан автор чи тIвар-ван авай шаир, публицист, композитор ва манидар, общественно-политический деятель  Седа­къет  Къаинбеговна  Керимова  я.

Зи манияр — зи фикиррин чешнеяр,

Цайибур я за илгьамдин перерив.

Лепе хьиз я зун гьуьлерин къужахда,

Агакьиз кIанз цIигел хьанвай кьерерив.

 

РикI ацIанваз, кьарай квахьай береда,

Хажалатар за манийриз элкъуьрда.

Чуьнуьхариз и саягъда дердияр,

Манийри зун бахтлу рекье къекъуьрда…

Седакъетан манийрикай адан ктабдин редакторди сифте гафуна кхьенва: “Халкьдин руьгьдив кьадайвал, цIийи кIалубра аваз, рикIе ацукьдай гафарин бинедаллаз тес­ниф­навай и ма­нияр эхиримжи йисара халисан хит­риз (лап рикI алаз тикрарзавай шейэриз) элкъвенва. Абур Решад Ибрагьимов, Жавагьир Абдулова, Жемила Залова, Роза Гьажиму­радова, Элвина Гьейдарова, Руслан Пирвердиев, Агьмед Къурбанов, Руьбабе Байрамбегова хьтин сейли маничийри тамамарзава. И манийрихъ сергьятар авач, абуру дуьньядин лезгияр агудзава, абурун рикIер рамзава”.

Инал чи рикIел пешекар композитор, РФ-дин искусствойрин лайихлу деятель Мегьамед Гьуьсейнован гафар хквезва: “Играми Седакъет ханум! Гьар гъилера куь дерин маналу шииррихъ ва хайи лезги мелосдин бинедаллаз, вини дережада сеняткарвилелди яратмишнавай манийрихъ яб акалайла, за рикIяй лугьузва: “Я Аллагь, адаз яргъи уьмуьр це!”

Инал артухан вуч гаф кухтада? За манийрин чIалар кIелзава:

Ягъ, я стха, “Лезгинкадал” илига, 

И макьамдин аламатдиз килига.

Далдамдинни зуьрнедин ван  атайла,

Адан аваз зи дамарра гьатайла,

Чил зурзада, зи кIвачериз звер къведа.

Шад жеда зун, зи вилериз хъвер къведа…

( “Лезгинкадал илига”  манидай )

* * *

Рагъ эхъвезва ви ятара,

Экуьн хийир, Самурдин вацI,

Са хабар це а патарай,

Зи квахьнавай сабурдин вацI.

Самурдин вацI, Самурдин вацI,

Зи квахьнавай сабурдин вацI…

( “Самур вацI”  манидай )

За мад ва мад кIелзава. Седакъетан манийра зал усал, буш, гьикI кIантIани хьурай лагьана, харада тунвай гафар гьалтзавач. Абур шаирдин рикIин хьиз, халкьдин рикIин гьиссерив, къайгъуйрив ацIанва.

Композиторри гьавиляй лугьузвайди я: “С.Керимовадин манийрин чIалар иердиз туькIуьрнавайбур, рикIел хъсандиз аламукьдайбур я. Абур гьар са цIарцIи, гьар са гафуни чпихъ ялзавай, маналу, аваздалди регьят­диз лугьуз жедай чIалар я. Гьа и карди инсанар и манийрихъ ялзава, абурун суьгьуьрда твазва…”

Заз Седакъетан женгчивилин, ватандашвилин, халисан лезгивилин гьиссер артух мукьва я. Адан чIаларин нев галукьай рикIер секиндиз, къайгъусуздиз тадач. Маниди абур, муркIари кьунваз хьайитIани, уяхарда, юзурда, къарсурда…

Мубаракрай цIийи ктаб!

Мердали Жалилов