Ламни хеб

 

ГьикI ятIани, ламравай

Хабар кьуна хипе са:

«Гьикьван ялда датIана

Идан-адан пар вуна?

Ксуз цурин пипIе са,

Къазанмишна эхирдай

Темпел ламран тIвар вуна».

«Эхь, — лагьана ламрани, —

Заз зи тIварни, пешени

Зи чандилай масан я.

Дуьньядикай хабарсуз,

ЧукIул алай туьтуьнал,

Вун хьтин хеб хьунилай,

Винел даим пар алай

Гьа лам хьунни хъсан я!»

 

Ламни шаркIунтI

 

Хабар кьуна шаркIунтIди

Пар алай са ламравай:

«Лагь, гуьнедай эвичIун

Регьят яни, тахьайтIа,

Аста-аста экъечIун?»

«Эгь, — лагьана а ламра, —

Ни вахъ галаз суьгьбетрай,

Далудал пар алайла,

Дуьз рекьизни лянетрай!»

«Лезги газетдин» 2023-йисан 46-нумрадай.