Кстах сусан мани

 

Кеф-кефина папад кIвале

Гьазурди нез авай тир зун.

Мамад патав къад сан къене

Низ акур тир кIвалах авун.

Гила зи гьал хьанва чIуру,

Герек жезва зегьмет чIугун.

Яб це, вахар, дерт пара я,

Заз са тахьай кар хьана хьи,

Гъуьлуьз атай йисан къене

Закай кьурай тар хьана хьи.

 

Гъуьл я лугьуз са буьндуьгуьр,

КьацIанвай сад хквед кIвализ,

Бязи чIавуз хтай ферсуз,

Пиян хьана катда йифиз.

Са вичиз ваъ, идаз, адаз

Фида пулсуз кIвалах ийиз.

Я чан вахар, дерт пара я,

Зи кIвалин юкь чIур хьана хьи,

Гъуьлуьз атай са сан къене

Заз кIваликай сур хьана хьи.

 

Пудра, духи вич амай туш

Бульвар!  Зи чан, вун гьинава?

Хуьруьз атай заз хьана гуч,

Зи рикI къене мур хьанава.

Жегьеннемдиз ихьтин гъуьлер,

Зун шегьердин дердинава.

Я чан вахар, дерт пара я,

Заз аламат кар хьана хьи,

Гъуьлуьз атай йисан къене,

Закай кьурай тар хьана хьи.

«Лезги газетдин» 2023-йисан 46-нумрадай.