* * *

Акъуддай хьи за вун рикIяй,

Хурун перде къазунна.

Элуьхардай ашкъидин цIай,

Зинданда жув кутIунна.

 

КIандай хьи заз вун хуьз рикIе,

Кьуна, рагъ хьиз, гъилерал.

Шуьрбетар хъваз ширин меце,

Ашукь яз ви вилерал.

 

Амма масад ганва кьисмет, —

Кьуд пад хьанва ичIивал.

Цифедик ква зи цав, зи мет,

Артухариз мичIивал.

* * *

КIела на зи сирер вири,

Чуьнуьх рикIин деринра.

Багъиша заз тIалар ири,

Уьмуьр мадни ширинра.

 

Эциг жуван гъил зи рикIел, —

КIанивилин сел ава.

Дамаррай зи катзава вел, —

Чидач квекай хъел ава…

* * *

Заз язухни къвезва адан,

РикIивай я пехилни.

КIанивилиз багъишна чан,

Кьил квахьнава эхирни.

 

Са кардихъ я кас инанмиш,

АтIун тийиз умуд гьич,

Гъиле гьатда ширин емиш,

Ахвар ятIан гьеле вич.

* * *

Гьахьна кIвализ мили шагьвар,

Къекъвезва зи чарара.

Вуч квахьнатIа? Вуч я ялвар?

Гьи  фикирдик умуд ква?

Вуч тада зи цIарарал?..

* * *

Бирдан рикIе гьахьна серин,

Дустунини авуртIа хъел,

Жез  хьайитIа дуьнья дар,

РикIел гъваш нур хайи чилин,

Секинара агатай шел,

Аялвилин гатут вар.

 

КъакъатайтIа бирдан умуд,

Гъиз хьайитIа къастуни фер,

ХьайитIа вун намусри куз,

Са-сад цифер анихъ алуд,

РикIел хкваш авайди хъвер,

Дидед лайлай, уьмуьр гуз…

Урус чIалай.

Таржумаяр — Мерд  Алидин.

«Лезги газетдин» 2021-йисан 31-нумрадай