Адакай Алкьвадар Гьасан эфендидин «Асари Дагъустан» ктабда лагьанва: «Къуба уезддин ТIагьиржал хуьруьн агьали Гьажи Эмирали эфенди гьакъикъи алим ва камалэгьли хьана». Ада сифте хайи хуьре, ахпа Къубада, гуьгъуьнлайни Вини Ярагъдал шейх Мегьамедан медресайра кIелна, диндин ва тIебии илимар, рагъэкъечIдай патан чIалар чирна.
Шиирар ТIагьиржал Эмиралиди лезги ва туьрк чIаларал теснифна. «Дурнаяр», «Жагъурда», «КIани яр», «Лугьуз-лугьуз», «Жедач», «Хъсан я» ва маса эсерри шаирдин чIехи бажарагъдикай лугьузва. Абур чи куьгьне поэзиядин гуьзел чешнейрикай я.
Шаирдин ирс М. Ярагьмедова ва А. Мирзебегова кIватI хъувуна. Адан са кьадар эсерар 1992-йисуз акъатай «Эмир Али. Эмираслан Гъани» ктабда гьатнава.
«Лезги газетдин» 2025-йисан 19-нумрадай
