СтIал Сулейманан — 155 йис
СтIал Сулейманаз
Горькийди вичи
Адаз Гомер лагьана.
Орденни чIехи
Адан хурал чIагана.
Адан сивяй гьамиша
Жавагьирар аватдай.
ЧIал къизил я, гимиш я,
Ярни лаз-экв акъатдай.
Адаз кIандай инсанар,
Зегьметчияр ватандин.
Ада негьдай душманар
Гафуналди гьулдандин.
Вуна, хъуьрез фекьийрал,
Гъалибна гьахъ, Сулейман.
Кьуьлни гьалчна зилийрал,
Гьулдан ва ракь Сулейман!
Ви ишигъдин гафари
Дагълар экуь авуна.
Рагъ чкIай ви чIалари
Уьлкве чIехи авуна.
Миллионрин рикIера
Вун рагъ хьанва, Сулейман.
Безетмиш яз цуьквера,
Са багъ хьанва Сулейман.
Загьид Гьажиев (1898-1971). Авар чIалай
***
Горькийди — вич баркаллу тир — Гомер я
Лагьанай вун къад лугьудай асирдин.
Вун чешне я, пас такьадай гевгьер я
Несил патал кар-кIвалахда девирдин.
Багатыр Мегьамедов (1903-1945). Дарги чIалай
***
Гваз ялавлу гаф, ашукьдин яракь тир,
Кардик кутаз, гьам къилих, гьам ахлакь тир,
Вич саламат, мягькемвилиз са ракь тир,
Халкьдин мани, чIал лагьай вун Сулейман.
Мегъуьн тарци вичин хилер, путар хьиз,
Вунани зун хьтин — цIийи чIалар гъиз —
Халкьна шумуд шаир, экуь къастар хьиз,
Авай чпихъ гуж-алакьун, Сулейман.
Юсуп Хаппалаев (1906-2006). Лак чIалай
Вун чахъ гала
Чи арадай вун акъатна лугьудай
Шак бажагьат чи рикIерихъ галукьда.
Вуна хурай гьевеслу яз акъудай
Гьар чIал халкьдиз истеклу яз амукьда.
Заманади эх тежедай зулумдин
Гьалчзавайла чал къванерин къаябар,
Ви маниди чун аксиниз гьукумдин
Ракъурзавай тергун патал азабар.
Вун гьа ЧIехи дяведани Ватандин
Окопра — чаз вун гуьзуьрдай аквадай —
Хьана, ви сес руьгь хкаждай инсандин
Чахъ галаз — чаз викIегьвал гуз — рахадай.
Къени къвезва сес — манидин сафадихъ
Тамарзудан кIвалер авач тар яна.
Чи шадвилин, чи суварин суфрадихъ
Чна чка таз ава ваз, тIвар яна.
Гьар са куьна давам жезва уьмуьр ви:
Къудратдани, мешребдани вядедин,
Гафарани халкь ийизвай шиир зи
Алхишдиз на тариф авур уьлкведин.
Абдул Батыров (1911-1960). Къумукь чIалай
______________
Муталиб Митаров (1920-2011)
СтIал Сулейман
Шаирвал — сад чирагъ кузва кьегьалдин,
Ялавлу цIай, цIун мурз азад рикIерин,
Чаз, несилриз, экв гуз вичин камалдин,
Чун шерикар ийиз вичин рекьерин.
Бенде авач адал амал тийидай,
ЦIар техуьдай рикIе чIехи шаирдин:
Кар авач за адан тариф кхьидай —
КьетIен устад я Сулейман шиирдин.
Йисарин тIем татай адан гафуни
Лув гузва къе цава, азад къуш хьана.
Земземдин яд — пашманда зун тахьуни —
ЯтIа, чIал я адан, хъвадай, хуш хьана.
Табасаран чIалай
______________________
Адам Адамов (1931-2006)
Камалэгьли — вилер экуь аял хьиз,
Цуькведавай кьибле чуьл хьиз, руьгь чIехи,
Зун къайгъусуз, кьарайсуз тир, ккIал хьиз,
Садлагьана акъвазайла рикI чIехи…
Ватан патал чанни гуз вун гьазур тир,
Ваз ам чидай, хциз вичин диде хьиз.
«Дуьньяд ругуд пай тир» уьлкве, машгьурди,
Ви вилера гьахьдай, хайи куьче хьиз.
Чир хьанач ваз пехилвал ви яшинда,
Вил пичIи яз къекъвенач гьич рекьера,
Къайгъудар яз кьецIилданни гишиндан
ЭкъечIна вун жафайрайни гьекьерай.
Кьабулайла чи лап чIехи меркезда,
Авур чIавуз гьукуматди гьуьрметар,
На сумагрин, шал-парчадин звезда
Хунни запун хкяна ваз — пишкешар.
Булах хьиз я вун дагъларин руварин,
Жанлу мани, акъваз тийиз, авахьиз.
Ви илгъамдив виливал гва цаварин,
ЦIелхемар гва цIайлапанрин, алахьиз.
Рагъни тIурфан алциф хьана, сечме хьиз,
Багъишзава на чилиз мад гуьзелвал.
Къвез илифиз ава халкьар чешнедиз,
ГьакI ятIани тIимил жезвач цIигелвал…
Лак чIалай.
Шиирар лезги чIалаз И. Гьуьсейнова элкъуьрна.
