I
Къе вун хайи тарих йикъан,
За гьам рикIел гъана, буба.
Ви яшайишдин гьалдикай
Зун рахана инал, буба!
Акъатдалди дуьньядиз вун,
Диде-буба хьана тахкун,
Малумарна чеб чара хьун.
Диде вин рахкана, буба!
Лап гьа кьиляй гъвечIиди яз,
Хайи диде авачиз ваз,
Уьмуьр вин, лап тазаз амаз,
Азиятдик фена, буба!
Ирид йисахъ агакьнамаз,
Гьа къуншидин гьаятдаваз,
Вахчуна вун вичин патаз
Ви бубади гена, буба!
Кьвед лугьур паб гъанваз гьадаз,
Гьа тахайди лап писди яз,
ГьажикIад фу гьич тагуз ваз,
КIандачир вун рикIиз, буба!
Хуьрек недай гьа гьан чIавуз,
КIасиз жедай, мумкин тагуз,
“Дулмад кIусар са пай тур”, луз,
Алахъдай вал йифиз, буба!
Чантада фу мухан ичIиз
Туна, къуншид маларив физ,
Йиф хьайила тIуна къаткиз,
Хабар жечир месиз, буба!
ЦIукьуд саваз дуланмишиз,
Фена гьа Дербент шегьердиз,
ХьайитIани кIвалах ийиз,
Жибин хьанай ичIиз, буба!
Кьуд йиса вун батраквиле
Дербентда са кулакд кIвале,
Са затIни гьат тийиз гъиле,
Мад хтана хуьруьз, буба!
Хуьряй къучIна вун Генжедиз,
Фикир хьанай, гьа гьаниз физ,
Гьа гьана вун дуланмишиз,
Фена фялевилиз, буба!
Кьве йис хьана кIвалах ийиз,
Килиг садра эхир кьилиз:
Са кепекни амукь тийиз,
Рахкъуз хьанач кIвализ, буба!
Ина гьакIа гьаларив кьаз,
Катна Самарканддин патаз,
Пуд суз гьана рабочий яз,
Мад алукIна эскиз, буба!
Сырь-Дарьядин ракьун рекьел,
КIвалах кьуна гьана муькъвел,
Кьве йисни са шумуд вацрал
Хьана гьанал алаз, буба!
Гьич санални фу батракдиз,
Бегьем такваз сакIан вилиз,
Килигнамаз мад жибиндиз,
Мад хьана гьакI ичIиз, буба!
Генже, Баку сад тир михьиз,
КIвалахд гьакъи текъвез гъилиз,
Батракд гафар ише тефиз,
Фена вахтар мичIиз, буба!
Къанни цIикьвед хьайла йисар,
Аваз талантдикай хабар,
Гъиле кьуниз гьа-гьа чIуз кар
Хьана гьакIа хиял, буба!
Вуна туькIуьрай сифтегьан чIал,
Фена лагьайлахъди чатал,
Дегиш хьана гьабур хиял,
Кткана лап гьакI къал, буба!
“Батракдивай я ихьтин гьал
Лугьуз жедай туш. Вун “пашел”.
Гьинай чуьнуьхна — лугьуз, чIал”.
Вал ийичир амал, буба!
Кесибдикай хьунухь шаир
Девлетлуйриз лап залан тир.
Вун хьтин зегьметдик квай фекъир
Эзмишун тир хиял, буба!
Ви гафариз къимет тагуз,
“Вакай шаир жедач”, — лугьуз,
Гьар патахъай гьакI ваз къургъ гуз,
Акьалтдачир винел, буба!
Гьа — гьабурун такIанвилиз…
Килиг тийиз гьич са куьниз,
Хьана кIвалах тухуз на кьилиз,
Хвена ви шаирвал, буба!..
II
Гьа — гьан чIулав йикъаз къарши
Совет власть атана чи.
МичIи дуьнья хьана экуь,
Гана ишигъ, эквер, буба!
Ачухна рехъ гьар патахъди,
Гьич санихъни тушиз кIиви,
ЦIийи хьана батракди ви,
Ачух хьана рикIер, буба!
Башламишна колхоз бине,
Хьайилахъди гьа чи хуьре,
Какахьна вун эвел кIвенкIве,
Гуз хьана на эвер, буба!
На ви уьмуьр эхирдал кьван,
Гьич са патахъ тагана ян,
Партияд рекье эцигна чан,
Хьайид я гьа тегьер, буба!
Социализмад нур чкIана,
Гьар са карда гъалиб хьана
Гила хьана цIийи гьава,
Зарб кткана рикIик, буба!
Сад-садав хьана са стха,
РикI-рикIивди хьана мукьва,
Михьиз дуьнья хьунухь гьакIа –
Ваз кIанда азадвилер, буба!
Партияди, гьукуматди
Къимет гана кIвалахиз ви;
Гьар патахъди гьяркьуь уьлчуь,
Ачухна ваз рекьер, буба!
Вун кефсуз тир эхир къара,
Ви тапшуругъ мадни пара,
Дуьз рекье тваз, чаз лагьана
Гафар на ви сивин, буба!
“Вафалу хьухь чи Ватандиз,
Гьар са кардал куьн хьухь хциз,
Чан эцига партияд рекьиз”,
На лугьудай якъин, буба!
«Лезги газетдин» 2019-йисан 20-нумрадай
