ЧIал амай кьван…

Писателрин гьа сад лагьай съезддал,

Москвада, Ватандин чи меркезда,

Дамахдалди, ава лугьуз эвезда,

Гомерни вун эцигнай са терезда.

 

ЧичIен бармак, магьут чухва, гъиле лаш,

ЦIададай тир Гьамзатни тир ваз юлдаш.

Шиирралди рахаз гьакьван фад-фараш,

Делегатриз лугьуз хьанай “Ай къардаш!”

 

Шиирар ви гьуьлер хьиз я, дерин я,

Гьа вахтунив гекъигайла, серин я,

Гьевеслувал Самур хьиз я, къалин я,

Ви руьгьдин тIуьн шуьрбетдилай ширин я.

 

ЧIалари ви шумуд несил уяхна!

Вун рикIерин пас такьадай дамах я!

Абукевсер авахьзавай булах я!

Хура михьи цIелхем авай чахмах я!

 

Хайи чилел, чи лекьерин маканда,

Лезги чIалал рахазвай гьар хизанда,

Ватан кIани гьисс аватIа ви чанда,

Сулейманан са чIал кьванни чиз кIанда!..

 

Ви шиирар гьар дердиниз дарман я.

Цаварилай агакьнавай иман я.

Вишни зур ваъ, мадни виш-виш заман яз,

ЧIал амай кьван яша я вун Сулейман!..

 

«Лезги газетдин» 2019-йисан 20-нумрадай.

_______________________________________________________________________

Дидедиз

Мартдин муьжуьд лагьай юкъуз

Ялварда за вили цавуз,

Аллагьди ваз бахт гуй лугьуз,

Чандилайни кIани диде!

 

Чи гатфарин сифте цуьквер,

Живедик квай цIару гъвергъвер,

Чина аваз гьамиша хъвер,

Багъишда ваз, ширин диде!

 

Заз хъсанвал, рикI-чан гайи,

Руьгьдин къуват, сагъ тан гайи,

Лезгистанда макан гайи,

Зи мергьямат, акьул диде!

 

Залан парар ийиз кьезил,

Яргъи извай уьмуьрд мензил,

Икрамда ваз, агъузна кьил,

Зи дердерин къалхан, диде!

 

Вун зи ватан, хайи чил я!

Заз таваздай назик гъил я!

Вун зи шадвал, лезги кьуьл я!

Лезгинка тIвар алай диде!

 

Акъудна за рикIяй къецел,

Пак гьиссеркай кIватIай гъезел,

Лугьузва ваз ширин мецел,

Ви балади, багьа диде!

«Лезги газетдин» 2020-йисан 11-нумрадай.