* * *
Я иеси кьей къацу доллар,
Виринра куьз ава ви тIвар?
Дуьнья михьиз кьазва гъиле,
Алахьдани икьван вилер?
Чапхун тваз на гьар са пипIе,
Шерни фитне аваз къене,
Ша жемир вун икьван ягьсуз,
Гьикьван гуда на ви руьгь цIуз?
Ви иеси — расу къузгъун,
Нефс акьалтIай пичIи азгъун.
Гьикьван жеда буржар, гужар?
Ваз жедани вири харжар?..
* * *
“Къизилдин” муьгъ,
“Къизилдин” муьгъ!
Ви тIуналла шумуд муьнуьгъ?
Агуддач на гьич халкьар чи,
Килигдач хьи гъилиз ичIи.
“Къизилдин” муьгъ,
“Къизилдин” муьгъ,
ГьикI ийидач де ваз экъуьгъ?
ВацI — жуванди, муьгъ — чарадан,
ЭкъечI тежез и арадай?..
“Къизилдин” муьгъ — рикIин гьарай,
Жезвач хьи зи гьарайдиз гьай.
Яд ксари кьунва рекьер,
Ийизва хьи дерин зи хер…
* * *
Къаткай кицIел къван элямир,
Хата я ам, къал акъатда.
Кар авачиз, гьакI гьавайда
Зайиф рикIиз тIал акъатда.
* * *
Яваш гьала машин жуван,
Бирдан вилик мал акъатда.
БицIек гзаф рахур ая,
Адай хъсан чIал акъатда.
* * *
Ваз аслан хьиз акур чIехид,
ГьакIан са чакъал акъатда.
Хуш рафтарвал гъилик ая,
Ваз гьуьрмет — агьвал акъатда.
* * *
Кьил гижидан тай жез тахьуй,
Эхир вун къавал акъатда.
Девирди вутI тухузва чун? —
Агъзур жуьр(е) суал акъатда.
* * *
Миллионар чуьнуьхайдан
Лавгъа кIуф цавал акъатда.
Вири гъиляй фена гьакIа,
Дустагъдин кьуд цал акъатда.
* * *
Иблисривай вун яргъаз хьухь.
РикIяй хуш хиял акъатда.
Я ребби, дуьз бенде на хуьх,
Эхир кьил камал акъатда.
* * *
Давуд, вун икI зайиф жемир,
Ажал ви мукьвал акъатда.
Фикирдизни гьич текъведай
Къаршидиз тIафал акъатда.
“Лезги газет”
Артухарна рикIин ялав,
Къелемдиз за гана къилав.
Хуш фикирар агатна зав,
Вун рикIеваз, “Лезги газет”.
Са багъри кас хьиз я жуван,
Руьгьдин суьрсет я гьар чIаван.
Къайгъуда жен хайи чIалан,
Вун кьилеваз, “Лезги газет”.
Багьа мугьман гьар са кIвалин,
Ша чна ам хушдиз кIелин.
Къайгъуда жен, гьар суз кхьин,
РикIин аваз — “Лезги газет”.
Кьиле хьана иблис, шейтIан,
Пайи-паярна хьи Ватан.
Къуба патай къвезмач ви ван,
Хьана чараз, “Лезги газет”.
«Лезги газетдин» 2019-йисан 19-нумрадай
