Илимдин булах
Жегьил алим Заур Алисултановаз бахшнава
КIватI хьанва чун, гьазур я
Къаршиламиш ийиз вун.
Агалкьунрал, Заур, ви
Гзаф кьадар шад я чун.
Кьабулдайвал дидед хва,
Вун кьабулиз гьазур я.
Вун чи язва экуь гъед,
Гьам чи намус, абур я.
СтIал-дидед гайи нек
Гьалал хьурай, гуьзел хва.
Машгьурна чун кьуд патаз,
И дуьньядин винел, хва.
Бубад гайи тарсарал
КIевиз амал авуна,
КIвач вегьенва илимдиз,
Зегьмет хиве такьуна.
Хкаж жезва вун аршдиз,
Агалкьунар мад хьурай.
Лув це вуна гьакI виниз,
Чи лезги халкь шад хьурай.
На илимдин бушлухар
МуьтIуьгъ ая гьакI жуваз.
Кард хьана, алад вилик,
РикIе чIехи къаст аваз.
Маяк хьухь вун жегьилриз,
Валай чешне къачурай.
Гуьгъуьналлаз твах жуван,
Чи тIвар машгьур авурай.
ТIвар хкажа лезгийрин
И дуьньядин винел на.
Вун чи кард я, лув це на
Гена виниз, кьегьал, на.
Дамахзава чна вал,
Вун илимдин булах я.
Уьзягъдиз кьазва тIвар,
Вун чи кард я, дамах я.
«Лезги газетдин» 2023-йисан 12-нумрадай.
_______________________
Сулейманаз
Кавказ дагълар рахазва ви чIаларал,
Мягьтел я зун ви уьмуьрдал, крарал,
ПIир хьанва чаз а ви гуьмбет сурарал,
Лезгийрин тIвар хкаж авур Сулейман.
Гьахъни батIул вилералди акуна,
Етимвилин дердер-гъамар чIугуна,
Уьмуьрда ваз гьич са шадвал такуна,
Девирдин цIу агаж авур Сулейман.
Ви чIалар чаз акьул гузвай булах я,
Вун чи намус, чи абур, чи дамах я,
Гьар чкадал вун чи руьгь я, даях я,
Вилерин нур, чандин къуват Сулейман.
Гьар са шиир, гьар гаф ви къизил я,
Манадизни деринвилиз са гьуьл я,
Гъавурда кьаз гьам регьят я, кьезил я,
Шииратдин пияла хъвай Сулейман.
Билбил хьанва бегьем сефил, рахазмач,
Гъам-хажалат авачир кас аквазмач,
И девирдин гъавурда чун акьазмач,
Муьгьуьббатдин ялавди кай Сулейман.
Нажмудинни Гьажи гьатайла кIеве,
Акси рахун кьуначир на гьич хиве,
Гъам-хажалат гьат авуна ви рикIе,
Дерт агъур яз месел хьайи Сулейман.
Пара кьадар умуднавай душманри,
Ви машгьур тIвар ишлемишиз кIан хьана.
Дустар патал вуна гайи жавабар —
Гьар са жаваб хажалатдин къан хьана.
Гьич садрани маса ганач дустар на,
ЧIур авуна кур ниятар, къастар на.
Ви тIвар кьуна, лугьузва къе тостар за,
Гьахълувилин шагь яз хьайи Сулейман.
Жегьил-жаван, гузва за квез къе эвер:
Ша шаирдин сурал вири гваз цуьквер,
Мадни чирин гьар лезгиди хуралай,
Сулеймана чаз тур чIалар, гьар эсер!
«ЛГ»-дин 2024-йисан 27-нумрадай
