Ялцугъар

 

Гьар патахъай рахаз билбил,

Чубанрини ядай кфил,

Хуьре хьайи жегьил уьмуьр

РикIеллама зи, Ялцугъар.

 

Кьуд пад хьана ана багълар,

Авахьна физ булахд ятар,

Хуьряй акваз Шалбуз дагълар,

Квез къурбанд хьуй, чан Ялцугъар.

 

Ви тIебиат женнет багъ тир,

Инсанрин рикI лацу агъ тир,

Ви халкьарин беден сагъ тир,

Бубайрин ватан Ялцугъар.

 

Етим Эмин бубад ватан,

Авай тир вахъ еке майдан,

Халкьдин рикI тир кIеви гьулдан,

Лезгийрин яйлах Ялцугъар.

 

Ви макан тир сувни дере,

Садран хьай туш хуьре фитне,

Кьегьал хваяр аваз кьиле,

Гьалал фу тIуьр чан Ялцугъар.

 

Алатна физ варцар, йисар,

Бахтлу хьуй ви хваяр, рушар,

Бубайри чаз гайи тарсар

Адет хьана чаз, Ялцугъар!

 

ГъвечIид — чIехид чизвай ана,

Чпихъ авай чIехи мана.

Адалатдин экIяна суфра,

Дамахзавай на, Ялцугъар,

 

Авай тир вахъ клуб сегьне,

Куьчеяр тир мирес-магьле,

Хатур-гьуьрмет авай еке,

Гьам девлет тир ви, Ялцугъар.

 

Халкь тир анихъ галаз вердиш,

Бул тир ана гьар са емиш,

Йигар гатаз, вахчуз бегьер,

Жегьилризни ийиз мехъер.

 

Дуьньядин са замана я,

Гьелбетда, вун чи ватан я,

Ви булахд яд чаз дарман я,

Вил  жеда вахъ, чан Ялцугъар.

«Лезги газетдин» 2023-йисан 12-нумрадай.