Ахцегьар

 

Кьакьан сувар, къизил багълар,

Шуьрбет хьтин ширин ятар,

Шалбуз суван серин шагьвар,

Квехъ ийизва рикIи ялвар.

 

Гадаяр куь викIегьбур я,

Шарвилидин гьунар авай.

Рушарни куь гуьрчегбур я,

Юкьва гимиш камар авай.

 

Припев:

Тарифдиз я хас Ахцегьар,

Гьайиф я тек таз Ахцегьар,

Суван кьулал цуьк Ахцегьар,

Зи къеневай рикI Ахцегьар!

 

Шейх Гьажи Давудаз

 

Жив цIрадач, рагъ татанмаз.

Шем цIрадач, цIай тахьанмаз.

Лезги халкьдин гъам цIранач,

Гьажи Давуд, вун татанмаз.

 

Кавказдин шейх, тIвар виневай.

Лезги, яхул сад авур хва.

Кьегьал тир вун, тур гъилевай,

Лезги чилер кIват хъувур хва.

 

Муьшкуьр, Шабран, Шамах, Ширван

Чи рамагрин кIурук хьанай

Лезги гапур, хци гьулдан,

Мидяйрин чи хуруз  фенай.

 

Халкьдин кьиле хьайи Давуд,

Вун лезгийрин рикIе ама.

Лезги регьбер хьайи Давуд,

Ви тIвар къени вине ама.

 

Лезги марш

 

Лезги, рутул, цIахур, удин

Чун я вири Алпан иви.

Табасаран, агъул, арчи —

Чун я вири Алпан иви.

 

Кьил вине яхъ, зи кьегьал халкь!

Хайи Ватан, чIал вине яхъ!

Бубайрин пак тIвар вине яхъ!

Кьегьалриз хас кар вине яхъ!

 

Кавказ — сувар, Каспий — навар,

Цуьк аватай Ватан я чи.

Рикlин гьава, асил, гьунар,

Мердвал авай Ватан я чи!

 

Зи кьегьал халкь, садна къуват,

Хкаж цавуз  Алпан тIаратI.

Зи хуррит халкь, зи багъри халкь,

Хкаж цавуз Алпан тlаратl.

 

Кьил вине яхъ, зи кьегьал халкь!

Хайи Ватан, чIал вине яхъ!

Бубайрин пак тIвар вине яхъ!

Кьегьалриз хас кар вине яхъ!

«Лезги газетдин» 2022-йисан 2-нумрадай.