Зул алукьна
Къайи гару уьфт язава дереда,
Ракъин нурар марву тарцин хилерал
Къугъвазава, гар кткайла, пешерал,
Къуза пата, кьакьан дагъдин синерал,
Кьеркьин бармак — сифте атай живедал
ЦIарцIар гузва дагъларин чи кIукIушри
Къветрен къакъра къвезва яргъал гуьнедай,
Гату, кайи цацун-кулер арадай.
Зулун къаю гуж гузава гьайванриз,
Пехъерик — къал, къавах тарцяй гьарайриз.
Хипен, малдин ван ацалтна гуьнедал,
Эхиримжи хъинез кьери кьурай векь,
Яваш-яваш агакьзава хъуьтIуьн мекь.
Югъ-къандавай вацIун къерех
Чуькьвез ава муркIади.
Аквар гьалда, кьуьд алукьда
Живер галай зурбади!..
Зи диде
Зи рикIин лепе,
Зи хурудин нефес,
Ахварайни ваз эвериз,
Шехьзава зун йифериз.
Хуьруьн кьилихъ, къуза пата,
Лацу цуькверин арада,
Ширин диде ахварава,
Женнет багъда ахварава.
Йисар физва вун галачиз,
И дуьньядик кумач зи хев,
Вахтуникай дарман тежез,
РикIин къене таза я хер.
Зи малаик ширин диде
Ваз Аллагьди Женнет гурай.
Вуна гайи виртIедин нек
Чаз, веледриз, гьалал хьурай…
Багъишламиша, рикI
Багъишламиша, къеневай рикI,
Гзаф тIарвал гана за ваз.
Багъишламиша, къеневай цуьк,
ЧIулав рангар эцигна вал.
Къене кайи, кабаб хьана,
Ви гьалдикай хабар кьунач,
Эцигна хъвер пIузарал за,
РикIин къенез шагьвар ганач.
Кьисмет я им лугьуз жуваз,
Алдатмишна гзаф за вун.
Ви гьарайдин ван къведайла,
Ирид дапIарра тунай за вун.
Багъишламиша, кайи зи рикI,
Вахтарикай дарман хьанач,
Дердер гзаф гайи закай
Ваз гьакъикъи душман хьана…
Зи Ватан
Зи Ватан —
Дагъустан!
Хайи чил —
Лезгистан!
Лезги чIалал рахада,
Гьуьрметдалди жуванбур я лугьуда.
Лезгияр я зи вахарни стхаяр.
Лезги дувул, дидеярни ата-бубаяр…
Лезгияр — архаяр зи,
Кьурагьжув я зун, ашарэгьли.
Зи миллет я зи дамах,
Салам гуда лезгидал,
Жаваб гуда лезгидал.
Кьегьалри кьилел бармак алукIда,
Адан къимет итимвилелд къалурда,
Лезги вахан, папан абур
Кьилел алай келегъа,
Намус хуьда,
Бубад бармак кIвачик, чилел тевгьена.
Гзаф зегьмет чIугвадай халкь!
Ширин чIалал рахадай халкь!
Куьн терг ийиз алахъайбур
Катарда на кьулу-кьулухъ,
Терг авуна, гъуд гана,
Лекьери хьиз дагъдин синелай лув гана…
Шаирди вакай шиир кхьиз,
Манид цIарцIе вал дамахиз,
Гужлу тIварцIихъ — уьлкве Алпан,
Ватан я зи рикIин дарман…
Зун рази я
Ватан патал чан эцигиз,
Кьадар авач гуьрчегвилиз!
Зун Ашукь я!
Зун лезги я!
Дагъустанви!
«Лезги газетдин» 2022-йисан 2-нумрадай.
