Мубаракрай!

(Шайдабег Мирзоеваз)

 

Чи адетрин я вун устад,

Тербия гун — рикIин мурад,

Гьар са карда хьурай вун шад,

Ваз юбилей мубаракрай!

 

Несилриз на гузва тарсар,

Лекциярни тамам курсар,

Тамамбур хьуй вири къастар,

Ваз юбилей мубаракрай!

 

Савадлувал авай инсан

Гьар къадамда жеда хъсан,

Вун виридаз я лап масан,

Ваз юбилей мубаракрай!

 

Дережаяр хьурай чIехи,

Вун акурла, я чаз хвеши,

Илимда вун хьанва рехи,

Ваз юбилей мубаракрай!

 

Камал – дерин, хесет – къени,

Къастунал вун я лап кIеви,

Кьегьал я вун, хва я лезги,

Ваз юбилей мубаракрай!

 

Алатдач ви тIвар рикIелай,

Халкьдихъ рикI кузвай кIевелай,

Алхиш кьабул чи мецелай,

Ваз юбилей мубаракрай!

 

Илимда вун ава вине,

Грант гьатна цIи ви гъиле,

Акъуднава ктаб еке,

Ваз юбилей мубаракрай!

 

Аллагьди ваз гузва нуьсрет,

Алим я вун авай гьуьрмет,

Артух хьурай руьгьдин девлет,

Ваз юбилей мубаракрай!

 

Чандин сагъвал, гзаф яшар,

Хьурай вахъ мад чIехи бахтар,

Тарихда на тазва ви тIвар,

Ваз юбилей мубаракрай!

 

Кьилиз фирай вири къастар,

Академик – лайихлу тIвар,

Кьисмет хьуй ваз галаз дустар,

Ваз юбилей мубаракрай!

«Лезги газетдин» 2023-йисан 36-нумрадай