Герейхан Герейханов «Лезги газет» кIелзавайбур патал цIийи кас я. ГьикI лагьайтIа, адан эсерар газетда сифте яз чапзава. Ам 1961-йисан 14-августдиз Мегьарамдхуьре дидедиз хьана. 1978-йисуз Дербент шегьердин 19-нумрадин юкьван мектеб акьалтIарна. Гуьгъуьнлай ДГУ-дин юридический факультетда чирвилер къачуна. Хейлин йисара вичи хкягъай пешедай намуслувилелди зегьмет чIугуна. Чешнелу хизан арадал гъана, 4 велед уьмуьрдин шегьредал акъудна. Ам 3 хтулдин чIехи бубани я.
Азад вахт Г.Герейханова шиирар кхьиниз бахшзава. Вичин эсерар ада урус чIалал теснифзава. Абурукай гзафбур «Стихи.ru» порталда чапнава.
Агъадихъ гузвай таржумайра шаирдин яратмишунрин эфзелвал, маналувал тамамдиз гьат тавун мумкин я. Амма са кар якъин я: Г.Герейханов гафарикай шиирар «хразвай» тупIал шаир туш, адаз шаирвилин гьакъикъи бажарагъ ава. Адан шииратдин алемдихъ галаз мукьувай таниш хьайила, гьа ихьтин фикир арадал къвезва.
«Лезги газет»
_______________________________________________________________
Ава экуь инсанар…
Ава экуь инсанар – квахь тийир гелер,
Абурун кьадар бул жедайди туш.
ЧукIурзава абуру кьудФ патаз эквер,
Багъишзава хъвер – гьакьван рикIиз хуш.
Хас я чпиз хъсанвал, къилихар къени,
Ашукь жеда гьар са кас абурун ванцел.
Руьгь кутазва абуру инсанрик кIани,
Рахадайла шадардай гаф ала мецел.
Бязибуру абуруз «ахмакь» лугьузва,
Ахьтин фикир гвайбурун къвезва заз гьайиф.
АквазватIан вилериз, руьгьер я буьркьуь,
«Гьерекатра аямдин» хьанвайбур зайиф.
Кьисметдин нифретар… Уьмуьрдин метлеб
Инсанвилин дережа алакьун я хуьн.
Гьар са инсан мажбур я чIугуниз зегьмет,
Михьдайвал цIекIверикай бегьерар къуьлуьн.
Югъ я четин…
Югъ я четин, къурху квай йиф,
Гьар йисуз икI — элкъвез, элкъвез.
Гуз кIан ятIа жуваз куьмек
Къени гаф лагь, рахура мез.
Мукьвабуруз багъиша хъвер,
Гьардав ширин мецел рахух.
Дустарикай къвемир гьич хъел,
ГъалатIриз рехъ гумир артух.
Мергьяматдиз чидач часпар,
Важиблу я бицIи карни.
Галай чIавуз жувахъ дустар
Гьиссдач вуна залан парни.
Хъсан кардай эвез хгун
Хуьмир вилив, фикир дегиш.
Ваз, ви ният себеб хьана,
Кьисмет жеда къени алхиш.
Кьибле шегьер
Каспий гьуьлуьн, тик тепейрин арада
Кьибле шегьер акъвазнава уьтквемдиз.
Къадим къеле, гьаятарни магьалрин
Ухшар я лап риваятрин гуьмбетриз.
И шегьерди дегь девирриз тухузва,
Шагьидар тир чеб тарихдин легьзейрин.
Куьгьне цлар – сирерикай лугьузвай
Часпарар я пачагьринни регьберрин.
Вири иниз атайтIа, хупI хъсан я,
Имаратар вилералди аквада.
Гьуьлел чуьхуьн, багъдин емиш дарман я,
Ина гьардав ширин мецел рахада.
Дербент йисан кьиляй-кьилиз иер я,
Кьуьдни гатфар, кIантIа гад хьуй, кIантIа — зул.
Инаг гьакьван рикIиз чими шегьер я,
Мугьманризни ина ерли жеч сугъул.
Жум пешерин юкьва варз хьиз аквазва,
Кьежей хилел хурма ала рагъ хьтин.
Дербент шегьер, вакай алем рахазва,
Гьакьван иер – агакьнавай багъ хьтин.
Уьмуьрдин метлеб
Вуч я метлеб чи уьмуьрдин –
Машгьурвал хьун, дамах, къуват?
Рехъ атIана за суьгьуьрдин,
Легьзедани хьанач галат.
И пад ягъиз, а пад ягъиз,
Ахъайнач за тахтни къуллугъ.
Гьар са фикир атай кьилиз
ТуькIуьрна за, ийиз шулугъ.
Мукьва-кьили тийиз саймиш,
Хтанач мад дустар рикIел.
Гуя цавуз хьана ахмиш,
Туна крар алай чилел…
Инсанрикай хьана къерех,
Лавгъавилин есир хьана.
Агал хьайд хьиз бахтунин рехъ,
Зи деврандин эхир хьана.
…Кас гвач патав, хьанва ялгъуз,
Я мукьвабур, дустар рикIин.
Виневай кьил хьанва агъуз,
Къуза хьиз я гуьне – серин.
Дарих я зун, ама къе тек,
Къуллугъарни тIач хьана зи.
МичIи я хьи, аквазмач экв,
Вахчуна хьи завай вири…
Физва текдиз… Перишан югъ…
Етимвал зи течир сергьят.
Са вахтунда кьеж квай къуллугъ…
Ада къе заз гузмач менфят.
(Урус чIалай таржума авурди – Мегьамед Ибрагьимов
«Лезги газетдин» 2023-йисан 34-нумрадай.
