90 лагьай йисариз
Квахьна чавай бул девлетар, няметар,
Яр алукьай пакам кьиляй ахвар хьиз.
Пайда хьанва демократар-темпелар
Пис лежбердин къуьлуьн никIе таквар хьиз.
Шумуд йис хьуй кIватI жез, чикIиз векилар,
Са кар тийиз гъулгъулайрик менфятсуз.
Пачагьар луз, кьиле къвазна саилар,
Такабур тIвар беябурна сергьятсуз.
Валлагь, кIусни гьайиф хьанач «къуччагъриз»,
Эхир пучна гьукуматдин – Шурадин.
Дуьнмишарна халкьар вагьши къачагъриз,
Уьлкве, шаксуз, рук куьгьне Нашравдин*.
____________
* Нашравдин рук – яни виликдай къачагъар хьайи рук.
«Лезги газетдин» 2023-йисан 38-нумрадай
__________________________
Зи Дагъустан
Аскер хьайи сифте къалай
Вун рикIелай алуднач за.
Совет аскердин мецелай
Салам я ваз, зи Дагъустан.
Йисни зура къариблухдай
Суракь кьазва Ватандикай.
Хабар хьайла гьар сеферда,
РикIиз шад я, зи Дагъустан.
Вахъ галаз зун рахазава,
КIел-кхьизва, дамахзава,
Ви масан тIвар заз багьа я.
Ватан я вун, зи Дагъустан.
Зи паталай гьар са касдиз,
Гьар кьегьалдиз, гьар магьалдиз,
Фадлай хуьзвай гзаф багьа
Саламар я, зи Дагъустан.
«Лезги газетдин» 2024-йисан 26-нумрадай
_________________________
Гьинава бес куьн, чи дагъларин рухваяр?
Чи дагъларин тIвар хкажай
ЧIехи инсанар гьинава?
Дагъустан, ви къужахда хай
ВикIегь рухваяр гьинава?
Алимризни гана тарсар,
Чирвилерин чатун устIар,
Ярагъ эфенди ва Алкьвадар,
Куь насигьатар гьинава?
Таъсиблу хан Гьажи Давуд,
Лезги халкьдин даях ва гъуд,
Тик кьуна кьил, тийиз агъуз,
Турдин paпpaпap гьинава?
ЧIехи, зурба гьунар авай,
Хандиз акси чIалар рахай,
Кьуьчхуьр Саид дердиникай,
Якъутдин вилер гьинава?
Эй, къуватсуз дагъви Мадер,
Низ хкажда на ви ванер?
Етим Эмина авур дердер,
Бес гьадан чIалар гьинава?
Пехъи лам
(Басня)
Вини хуьре Буллагьаз
Терс хесетрин авай лам.
Бегьемдиз къайгъу чIугваз,
Хуьзвай ада, мух гуз, ам.
Темпел тир лам кьадарсуз,
КIандачир зегьмет чIугваз.
КьецIи жедай, такьатсуз,
Вахт хьайла парцик кутаз.
ГьикI ятIан къуншид хуьряй
Гьатнавай рекье Буллагь.
Ламра агъур тир парцяй
Гузвачир яб эсиллагь.
Хъел атана сагьибдиз,
Акурла гьал гьиллебаз.
Зур гайила къамчидиз,
ТIалди кана келлебаз.
Вичин рекьяй акъатна,
Зарбдиз физвай чуьлдай лам.
Буллагь лагьайтIа гуьгъуьна,
Са кIвачел (а)лачиз шалам.
Эхир са гуж-баладал
Лам хтуна жилавда.
Гила кар алай анал:
Гьи жуьреда гун жаза
КIвализ хтай Буллагьа
Лам гьаятдай гьарзарна:
«Им я лап хъсан жаза,
Гила чукур», — лагьана
Дугъридан, ламрал пехъи
Жанавур дуьшуьш хьана.
Акур легьзеда къучи
КIурар цавал хъхьана.
Нетижа: чIехидаз яб тагайтIа,
ламран чкадал къведа.
«Лезги газетдин» 2024-йисан 16-нумрадай
____________________
СикIрен къарар
Гьиндустандин са тама
Сейрзавай вагьшийри,
Аслан, сикI, сев, са вакIа,
ГьакIни маса башчийри,
Нубатралди абуру
Ийизавай суьгьбетар.
Гьарда вичин тарифлу
Ахъайзавай хкетар.
Тек ажуз сикIре вичин
Фендигарвал хуьз авай,
Ара атIуз асландин
Ада тариф ийизвай.
Садлагьана вагьшияр
Аватна са дагьардиз.
Пашман хьайи ничхирар
Тамашзавай цавариз.
Алатна кьвед-пуд йикъар,
Каш акатна вагьшийрик.
Акъуд авун са къарар
Меслятзавай чеб чпик.
Сев рахана нефс азгъун:
— Гишин я чун, гьал четин,
АкI хьайила, гила чун
ГъвечIидалай эгечIин.
Дагьардин есиррикай
СикI тир гъвечIи ажузди,
Вагьши агьалийрикай
Хамуз-якIуз ужузди.
Лап хъсан яз акуна
Севрен меслят асландиз,
Амма сикIре худ гана
Вичин иблис амалдиз.
СикIрез, авай къанажагъ,
Разивална меслятдал:
— Такурай заз гьич анжах
Гъил хкажиз асландал!
Аслан фендигар сикIрен
Тереф хьана, гьелбетда.
Сифте — вак, ахпа севрен
Кар акуна хевлетда.
«Лезги газетдин» 2025-йисан 30-нумрадай
