Шагь-Эмир Мурадов

Дагълар

 

Зун дагълариз хьана мугьман,

Булахри заз гана дарман.

АватIа захъ эгер иман,

Зи дин-иман куьн я,  дагълар.

 

Экуьн ярар майданравай,

Хважамжамар гарданравай,

ЗатIни жеч квез тIурфанривай,

Циферин чан куьн я, дагълар.

 

Чуьлдиз куьне бегьер гъизва,

Чи хуьрериз эквер гъизва,

Суьруьйралди хипер хуьзва,

ВацIарин ван куьн я, дагълар.

 

Такурай заз куь чIуру пел,

Экуь хьурай рагъ куь кьилел.

Лигим хьанвай къагьриман эл

Авай макан куьн я, дагълар.

 

Лайих я куьн муштулухдиз.

Лугьун за квез дерт ачухдиз:

Акъатайла къариблухдиз

Зи эрзиман куьн я дагълар.

«Лезги газетдин»  2021-йисан 3-нумрадай

__________________________________________

Рубаияр

1

Чи уьмуьрдин декьикьаяр камар я,

Абурун рехъ цIалцIам тахьун гъамар я.

Уьмуьрдин рехъ экуьвилин кукIушдихъ

Тухузвайди гьар инсандин гьунар я.

2

Жегьилзамаз уьмуьр багьа кьан, герек.

Мягькемарин кьуьзуьвилин чан, герек.

Фейи уьмуьр хушдиз рикIел хкирвал,

Гьар са йисан экуь тарих тан, герек.

3

Салам гуда кIвализ атай мугьманди.

Мумкин я, ваз гьакI салам гун душманди.

Дустни душман чириз алахъ гьамиша,

РикIик футфа кутаз тахьуй шейтIанди.

4

Диде кьуьзуь хьанва яшар тахьанмаз.

Ксузвач ам хва ракIарай тахтанмаз.

Хци хабар кьазвач адан рикIикай,

Вичин велед вичиз къаншар тахьанмаз.

5

Жуьрэтлувал важиблу я инсандиз.

Жуьрэтсузвал акваз кIандач деврандиз.

Кьегьал инсан са сеферда рекьида,

Ажуз ксар тIал я даим хизандиз.

6

КуькIвенатIа муьгьуьббатдин цIай рикIе,

Чан эцигун чарасуз я а рекье.

КIанивилиз мердвал, дуьзвал герек я,

Намусдални ийиз тахьуй гьич леке.

7

Бязибурун уьмуьр фида кIватIиз пул,

Къаних хьана, ялтахвализ, чIуриз тIул.

Намердвили, мискьивили кьуна рикI,

Кьуьд акъудда ифир тийиз кIвалин къул.

8

Кац авачир кIвале кьифре кьуьлерда.

Тух кацини кьифрехъ галаз хъилерда.

Чиркин кIвале алтIуш хьана тIветIери,

Хушраканри, тараканри мелерда.

9

Аял хуьмир чан-чан лугьуз къужахда,

ЧIехи ая ам зегьметда, кIвалахда,

Аялдикай инсан хьана кIандайда

Чан эцигна тербия гуз алахъда.

10

ВацIу къванер тухуда, сел атайла.

РикI къван жеда, ярдикай хъел атайла.

Хциз дуьнья дар жезва гьар сеферда,

Дидедин хуш вилерал шел атайла.

 

Зи уьмуьр

 

Давамариз ава жуван уьмуьр за,

Масадбурун туьгьмет, рахун галачиз.

Уьмуьрдикай ийиз даим фикир за,

Йикъар хьурай лугьуз, чайгъун галачиз.

 

КIвалахна за, зи рикI хьана зегьметдал,

Бахтунин рагъ алукьарна кьисметдал,

Вилер хьанач къанихвилел, девлетдал,

Яшамиш жез тараш-чапхун галачиз.

 

Гегьеншарна за дуствилин майданар,

Дустар я зи дуьз вафалу инсанар.

Авуна за хизандин гьал хъсанар,

Югъ хьанач захъ мугьман атун галачиз.

 

Шаирвилин четин кардиз гана чан,

Кхьиз, экуь фикиррал за гъана чан.

Дагъ-аранда зи манийрин гьатна ван,

Шад лифер хьиз, къаргъа-къузгъун галачиз.

 

Ингье гила кьуьзуь хьанва беден зи,

Картар кьадай гъуьргъуь хьанва кемен зи.

Амма рикIин кьуранвач гуьлчимен зи.

Чуру жив я, пашман акун галачиз.

 

Инсан физва

 

Инсан физва, рикI ачух я, гуьгьуьл — шад.

Авадан яз акваз кIанда гьар са пад.

Адан мурад — цIалцIамбур жен куьчеяр,

Къерехрани шамагъажрин жергеяр.

Манийрин ван къвез жен кьакьан кIвалерай.

Рушар акван цуьквер аваз гъилера.

Мукьвал-мукьвал дустар гьалтин салам гуз,

— Пакам хийир! ГьикI я ви кеф-гьал? — лугьуз.

Гьа икI чанда ашкъи гьатиз, инсанди

Кардални вич гьисс ийида кIубандиз.

КIанзавайди такIанвилер тахьун я,

Мерд инсанри дуствал кьиле тухун я.

«Лезги газетдин»  2023-йисан 15-нумрадай