Ша чунни фин…
Вун зи хайи Ватан я,
Дагъустан, Дагъустан!
Къацу дагълар макан я,
Дагъустан, Дагъустан!
Авачни чахъ хупI гуьзел
Ерияр, ерияр,
Ша чунни фин тамашиз,
КIани яр, кIани яр.
Жейран ава зирек тир
Дагълара, дагълара,
Билбил ава гуьрчег тир
Багълара, багълара.
Авачни чахъ хупI гуьзел
Ерияр, ерияр.
Ша чунни фин тамашиз,
КIани яр, кIани яр.
Инжи хьтин чиг ала
Векьерал, векьерал,
Зегьметчийрин рикI ала
Цуькверал, цуькверал,
Авачни чахъ хупI гуьзел
Ерияр, ерияр,
Ша чунни фин тамашиз,
КIани яр, кIани яр.
Дурнад вил хьиз аквазва
Булахар, булахар,
Къати гьуьл хьиз ргазва
КIвалахар, кIвалахар,
Авачни чахъ хупI гуьзел
Ерияр, ерияр,
Ша чунни фин тамашиз,
КIани яр, кIани яр.
1953-1955-йисар
«Лезги газетдин» 2021-йисан 3-нумрадай
________________________________________________________________________
Гьуьруь
Гьуьруь, за ви тариф ийин:
Гуьзелрин султан я Гьуьруь,
Хъуькъвер яру некьи хьтин,
Вилер ви мержан я, Гьуьруь,
ЧIарар – чIулав зилкъара хьиз,
Дердиниз дарман я Гьуьруь,
Рахун – тамам ширин шекер,
Ялгъуз кIвалин чан я, Гьуьруь,
Майва авай гьар са жуьре
Бегьерлу бустан я Гьуьруь.
Бустан ширин емишдив,
Къайси, хурма, кишмишдив,
АцIанвай гьар пиришдив,
Гуьзел, назлу нехишдив,
АлукIна пекдин либас,
Алад хурда еришдив.
Еришдиз къвед хьиз,
Гуьзел я гъед хьиз,
Ягълу обед хьиз,
Ширин я мед хьиз,
Хаму жейран хьиз вун таза,
Къвазнава мерд хьиз,
Хатур хамир муьштеридин,
Ша зун ваз къурбанд я, Гьуьруь.
Къурбанд я ваз, эй назлу яр,
Ша зи патав марал хьтин,
Гуьзел тушни хупI ви жамал,
Таза рикIин хиял хьтин,
Къизилгуьл хьиз, туна хура,
Хуьда за вун гьайкал хьтин,
Буйдиз кьакьан, къуьнер шумал,
Юкь шуькIуь я закIал хьтин.
Гагь гъиле кьаз, гагь гарданда,
Твада за вун гьайкал хьтин.
Гьайкал хьтин гуьрчег я,
ЧIарар хъуьтуьл ипек я.
ПIузар яру михек я,
Гуьзелвилиз вун тек я,
ТIебиатдиз гзаф хуш,
Асландилай зирек я.
Зирек я зурбаз,
Дамахни хуш наз,
Кутугдач хьи ваз,
Мир зи гаф отказ,
Мумкин ятIа, «ваъ» лугьумир,
Зун яр яхъ жуваз,
Вахъ галаз вад йикъан уьмуьр
Тухун эрзиман я, Гьуьруь.
Эрзиман яз вун рикIеваз,
Пагь, гьикьван замана я зун,
Саррафриз рикI чида якъин, –
Намерд туш, мердана я зун,
Гуьзел муьгьуьббатдин винел
Ашкъидин первана я зун.
Инсаф ая – ви дердина
Лап дили-дивана я зун.
Дадмиш ийин няметрикай,
Ви багъдин мугьмана я зун.
Мугьман хьтин яхъ азиз,
Регьят жеривал рикIиз.
Ая зи гьуьрмет виниз,
Акъуд зи минет кьилиз,
Лацу набат хьиз ширин
Я, бахтавар, вун рикIиз.
РикIиз вун хуш я,
ТIавусдин къуш я,
Гуьзелвал вуч я,
Ажеб са руш я.
Рахун адан къизил ятIа,
Нефес гимиш я.
Машаллагь, назар тахьуй,
Регьимлу инсан я Гьуьруь.
Инсан я вун хуш къилихдин
Халкьдиз гзаф гьуьрмет авай,
Акъвазнава таза багъ хьиз,
Жуьрба-жуьре нямет авай.
АцIанва лап сивив кьадар,
Магазин хьиз зиннет авай,
Заз акур туш ихьтин суфра
Кеф-кефият, гьуьрмет авай.
ЧIаганва хур, дуьзмишна хьиз,
Фенжанралди шуьрбет авай.
Шуьрбет хьтин ширин я,
Морожни хьиз серин я.
Муьгьуьббатдиз дерин я,
Камалдиз аферин я,
Кьуд патахъай атана,
Муьштерияр къалин я.
Къалин жечни бес:
АтIуниз – алмас,
Кхьей муханнас
Тагьираз вун хас.
КIел авуна, жаваб хце,
Мергьяматлу кас,
Гатфар йикъан экуьн сегьер
Хьиз, вун гуьлуьшан я, Гьуьруь.
Ша чунни фин тамашиз
(Мани)
Вун зи хайи Ватан я,
Дагъустан, Дагъустан!
Къацу дагълар макан я,
Дагъустан, Дагъустан!
Авачни чахъ хупI гуьзел
Ерияр, ерияр,
Ша чунни фин тамашиз,
КIани яр, кIани яр.
Жейран ава зирек тир
Дагълара, дагълара,
Билбил ава гуьрчег тир
Багълара, багълара,
Авачни чахъ хупI гуьзел
Ерияр, ерияр.
Ша чунни фин тамашиз,
КIани яр, кIани яр.
Инжи хьтин чиг ала
Векьерал, векьерал,
Зегьметчийрин рикI ала
Цуькверал, цуькверал,
Авачни чахъ хупI гуьзел
Ерияр, ерияр,
Ша чунни фин тамашиз,
КIани яр, кIани яр.
Дурнад вил хьиз аквазва
Булахар, булахар,
Къати гьуьл хьиз ргазва
КIвалахар, кIвалахар,
Авачни чахъ хупI гуьзел
Ерияр, ерияр,
Ша чунни фин тамашиз,
КIани яр, кIани яр.
(1953-55-йисар)
«Лезги газетдин» 2023-йисан 35-нумрадай
_______________________________________
Хендедаяр
Квез лугьудай кьве гаф ава,
Яб це гил заз, хендедаяр.
Квехъ айибар гзаф ава,
КIандач акваз, хендедаяр.
Ацукьнава куьн кIватI хьана,
Вирибурун гаф сад хьана,
Итимрикай азад хьана,
Кефиз жуваз, хендедаяр.
Ийиз куьне тIимил кIвалах,
Къачуда лап гзаф дамах.
Мад жезамач зун куь чIалахъ,
Куьн я къанмаз, хендедаяр.
Гьикьван ятIани куьн ялгъуз,
Гумрагь жезва йикъалай-къуз.
Хъийизамач гьич кьил агъуз,
Кьам цава кьаз, хендедаяр.
Дад гьатнава сиве цIийи,
Алвер ийиз юкъуз-йифиз,
Гьар патахъай абас-шагьи
КIватIиз гъутаз, хендедаяр.
Кьадач папариз эркеквал,
РикI жемир артух кепекрал.
Ишлемишмир куь гуьрчегвал,
Маса гуз наз, хендедаяр.
Руш акуртIа физвай гъуьлуьз,
Алахъда бахт адан чIуриз.
Им зиян я вири хуьруьз,
Бес я, акъваз, хендедаяр.
Хуьруьн са пай куьн хьанава,
КIвалера бул тIуьн хьанава,
Итимриз четин хьанава
Квевди рахаз, хендедаяр.
Такабурвал хьана артух,
Паб кьейидан къведач язух.
КIандач, лугьуз, адан дуллух, —
Жеда рахаз, хендедаяр.
Гьарда хуьда тек са аял,
Итим герек амач къвалал.
Фида жал и тегьер яргъал –
КичIезва заз, хендедаяр.
Куь кьадар лап жезва пара,
ТIиш туна чарадан чIура,
Гьарда вичиз ийиз чара,
Фидач яргъаз, хендедаяр.
Элкъуьр ийимир гьавайда,
Теклиф атайла субайдан.
Вучиз муьштери ахъайда
Гатай дарваз, хендедаяр.
Текдиз физвай уьмуьр гьайиф,
Дегиш ая куьне синиф.
Текдан къуват жеда зайиф,
Акваз-акваз хендедаяр.
Квез Тагьиран гьич хъел къвемир,
Хъсан-пис, лугьуз, ацукьмир.
Муьштеридилай элкъуьрмир
ХъуьтIуьз, яраз, хендедаяр.
«Лезги газетдин» 2023-йисан 46-нумрадай
