Алирза Саидов

* * *

И дуьнья зи рикIиз чими жедачир,

Зи куьче, вун алачиртIа чилерал,

Зун шаир яз и дуьньядиз къведачир,­

Къужахдаваз жуван лезги чинарар.

АтайтIани дуьнья зи квез герек тир,

Михьи цава чуьнгуьрдин сес тахьайла,

Сулеймана Алексеяз1 викIегьдиз

Гъил вугана, чими салам тагайла!

Дад къведачир цихъайни заз  чигедин,

Эгер адак Самурдин яд квачиртIа,

Чир жедачир заз михьивал  живедин,

Эгер а жив Шалбуз дагъдив  гвачиртIа.

Вучда вуна сарубугъдад факайни,

Паласадин ранг алачиз хьайитIа,

Вучда, я дуст, и чилерал вакайни,

КцIар шегьер такуна вун кьейитIа.

И дуьньядин хазинаяр багъишна

Тек са Дербент таганайтIа чили заз,

Лугьудай за: “Кьисметди заз  къаргъишна,

Гьуьлер гана, амма ганач гими заз”.

Лезги куьче, тапарар заз чидай туш,

Авай гафни лугьудай туш  кьулухъай,

Фитедавай пепеяр на хуьдай туш,

Я вацIарни ийидай туш хулукай.

Заз чизва вун гьулдан хьанвай ракь тирди

Гатадай кьван игитвилин чатарик…

Чир хьухь Ватан кьиляй-кьилди рагъ тирди

Какахьнавай стхавилин вацIарик!

А ракъини тухуда вун яргъариз,

Ракета хьиз, акъваздай вахт авачир.­

Агакьарда гележегдин ракIарив,

Зи цIвелерал живедин жанг алачир.

________________

1 Алексеяз — А.М. Горькийдикай рахун физва.

«Лезги газетдин» 2021-йисан 3-нумрадай

______________________________________________________________________________________

Дуьньядин берекат

 

— Дагъдин вацIар, вучиз санихъ физва куьн,

Гуя са рехъ къалурзавай хилер я?

Жаваб гана: — Са терефдихъ фейила,

Чун вацIар туш, кьурун тийир гьуьлер я.

 

— Рангар, вучиз квехъни тажуб сир ава,

Даим садав агатун куьз герек тир?

Жаваб гана: — Чна садвал хвейила,

Чун рангар туш, хважамжам я, гуьрчег тир.

 

— Сесер, куьне вучиз эхдач чаравал,

Вучиз, санал кIватI хьана, рикI ацIурда?

Къачу жаваб: — Санал лепе гайила,

Чун сесер туш, аваз я, чил къарсурдай.

 

— Гьарфар, квяйни аквазва заз аламат:

Къуьн-къуьне тваз алахъун вуч азаб я?

Жаваб гана: — Са жергеда хьайила,

Чун гьарфар туш, са камаллу ктаб я.

 

— КIвалер, куьнни таз жедач къе секиндиз:

Даим санал кIватI хьун — им вуч тегьер я?

Жаваб гана: — Санал эквер кайила,

Чун кIвалер туш, къудратлу тир шегьер я.

 

— Эй жегьилар, бес куьне вуч паталди

Къе дуствилихъ ийизва и гьерекат?

Жаваб гана: — Сад авурла майилар,

Чун вири я и дуьньядин берекат:

 

Гьуьлерни я, хважамжамни, авазни,

Ктаб, шегьер, ислягьвални диривал,

Эгер и чил акьул ятIа дуьньядин,

Чун я чилин рикI, дамарар, цицIивал.

«Лезги газетдин» 2023-йисан 35-нумрадай