Нумрадиз шиир

Чи хуьрера фадлай “Лезги газет” кхьизвай, кIелзавай ксар гзаф ава. Ахьтинбурукай сад Ахцегьа яшамиш жезвай чепиви Эбедан руш  Севинжи  Муртузалиева  я.

1976-йисуз юкьван мектеб акьалтIарай­далай кьулухъ ада Чеперин хуьруьн К.Марксан тIварунихъ галай колхозда зегьмет чIу­гуна, 17 йисуз эвела — кассирдин, гуьгъуьнлай­­ счетовод-бухгалтердин везифаяр намуслувилелди тамамарна. 1992-1998-йисара  мектебда пионервожатый, сифтегьан классрин муаллим яз кIвалахна.

Севинжи Муртузалиева 2014-йисалай Ах­­­цегьа яшамиш жезва. Вичин азад вахт дагъ­­­ви дишегьлиди яратмишунриз бахшзава. Са вахтунда хуьруьн культурадин кIвале гьевескар ар­тистка яз кIвалахай ада исятда шиирар кхьизва. Чи редакциядив ада 100 йи­сан юбилейдиз бахшнавай “Лезги газет” лезги халкьдин рикI алай” тIвар алай шиир агакьарнава.

 

“Лезги газет” халкьдин рикI алай

“Лезги газет” лезги чIалан бине я,

Лезги чIалал рахазвай пак чешме я,

Дидедин чIал кIанибуруз чешне я

“Лезги газет” лезги халкьдин рикI алай.

 

Вун са шумуд чиникай я ибарат,

Багьа я заз ви гьар са гаф, ибара,

Агакьардай чал дуьньядин хабарар,

“Лезги газет” лезги халкьдин рикI алай.

 

Космонавтар, малдарарни алимар,

Къагьриманар, регьберарни гьакимар,

Аквада чаз ви чинрай мад малимар,

“Лезги газет” лезги халкьдин рикI алай.

 

Лезги жемят сад авун ви мурад я,

Вун кIелзавай инсанарни лап шад я,

Садалайни аслу туш вун, азад я,

“Лезги газет” лезги халкьдин рикI алай.

 

Мубаракрай юбилей ваз чIехи тир,

Вун чи руьгьдин гъед я даим экуь тир,

Тарих ава вахъ къадим тир, рехи тир,

“Лезги газет” лезги халкьдин рикI алай.

«Лезги газетдин» 2021-йисан 10-нумрадай.