АтаначтIа…
Вуч муштулух гуз гьазур я мугьмандиз?
Эй дагъларин такабурлу пачагь лекь?
И маканар, чун фидайла Мугъандиз,
Аманат яз тунай за вал, къуччагъ лекь.
Ингье и раг, и еке къван. Къванцел чун
Муьгьуьббатдин тахтунал хьиз ацукьдай.
Инал ярди кхьейди тир “Зид я вун”,
Туьхуьн тийир чи ашкъидин сагълугъдай.
Вири тирвал ама ина: дагъ, раг, къван,
Къванцел кхьинар. Инаг хуш тир зи ярдиз.
Я лекь, гьинва зи яр, кIаниди? Фад лагь кван!
Тамир тIун зун къизил квахьай заргар хьиз.
Гьар сеферда хтайла зун гьа инал,
Зуьгьре гъед хьиз акъваздай яр экуьнин.
Чи икьрар тир алем кIватIун мехъерал,
Тамадани вакай авун деминин.
Вун шагьид тир. Бес ваз аян тахьайла,
Кьадар-кьисмет низ чир хьуй зи бахтунин?
Зи ярдикай це са баян, тахьайтIа,
Фида уьмуьр. Гуьзетдач гьич вахтуни.
Дуст, вахтуни хъверда викIегь виждандиз,
Дуьзвални гьахъ амадаг тир рикIивай.
Илгьамдикай верги жеда инсандиз,
КIанид патал, ватан патал рекьизвай.
Яр гуьруьшдиз атаначтIа, чун фида
Ам жагъуриз. Ярдиз хас я эглеш хьун.
ТIебиатдин къатариз чун илифда.
Вун — зи векил, яр уьмуьрдин юлдаш хьуй.
Алад, гада!
ПIапIрус чIугваз, туп-туп гумар акъудиз,
Вучиз акьван гъамлу я вун, азиз дуст?
Къе татайтIа, пака къведа ви Наргиз.
КIанивилиз хас я наз гун ва намус.
Пакани вач, муькуь къузни, гьамиша…
Алад, гада, къведа руш ви гуьруьшдиз.
КъведачиртIа, а гуьзел тир халича,
Ваз тIвар яна, ацIурдачир нехишрив…
Гьайиф зи…
Квай синихар хиве кьунлай хъсан кар
Жедан мегер авай касдиз намусар?
Геж ятIани, за кхьенва и цIарар,
Кхьин тийиз фейи вахтар гьайиф зи.
Къенез кудай туькьуьл эрекь цадай кьван,
“Хъвадач!” — лугьуз, кьинер-агьтер кьадай кьван,
Югъ-йиф талгьуз, гьуйдада жез, хъвадай кьван,
Къаралмиш яз фейи яшар гьайиф зи.
Гьар нянихъ жедай закай “пагьливан”.
Гафар гьалчдай дустарални лап залан,
КIвач япувай физ, гьар юкъуз жез пиян,
Къван акьуна, квахьай сарар гьайиф зи!
Гуьзел уьмуьр фена аваз ахвара,
Шалвардин кек таз хтана валара,
Халкьди лугьуз заз будала, авара,
Зи балайрин вилин накъвар гьайиф зи!
Са мус ятIани зи уьмуьр са нагъма тир.
Зи багърийриз зун рикI алай арха тир,
Заз дуьньядин вири рекьер ахъа тир,
Гьакьекь хьтин чIулав чIарар гьайиф зи!
Туба хьуй мад за вун гъиле хкьуртIа,
Вун себеб яз, зун духанра ахкуртIа.
Вуна, ички, сагълам беден кьурурна.
Бадгьавая фейи йисар гьайиф зи!..
Кьуд цIарар
— Квез темаяр гьинай гьатда кхьидай? —
Суал гана са жегьилди шаирдиз.
Вичиз течиз, а дагъдин кIукI, вич алай,
Тема тирди куьтягь тежер шиирдин.
* * *
Гатфар хьанва. Къацу хьанва тIебиат.
Лацу либас ала элдал рекьевай.
Рекьевайбур!.. Лацувал твах сефердиз,
Гадарна тур чIулав крар рикIевай!
* * *
Уьмуьр физва, чун саймишни тавуна,
Гьисабзава чи гьар са кам вахтуни.
РикI сугъул кьаз акъвазайтIа къувунна,
Гьич инсафич чаз тарихдин чархуни.
* * *
Чиг хуш туштIан рекьевайдан вилериз,
Нуш жеда ам цяй акъатай марвардиз.
Гьар са чешме авахьдачтIан вирериз,
Авахьда ам рушарив гвай кварариз.
* * *
За фу незва. Гьалал тахьуй а ризкьи,
Бичинчидиз икрам тийиз тIуьртIа за!
Рекьева зун… Хийир тагуй заз рекьи,
Рехъ кутурди саймиш тийиз туртIа за!
* * *
Дуьнья, тар хьиз, куькда авачир.
Садбуруз ам кIанзава лап гудна хаз!
Гьял тежедай авайди туш гьич са сир.
Гьерекатин фасагьат мез худда тваз!
* * *
Вун са кIеви менгенадиз ухшар тир,
Агатдалди муьгьуьббатдин цIелхем, рикI.
Мани лугьуз къвазна гила чинардик,
КIанзава ваз къужахда кьаз алем, рикI!
* * *
ЦIийи йисан календарь ква зи вилик.
За тупIалай ийизва къе са-са чар.
Эй имарат, — фикирзава зи кьили, —
Лагь, гьи югъ я, за кхьирди эхир цIар?
Сивел хъвер…
Куьне кIвалах идай чIавуз,
Авайлани кIвале ялгъуз,
Чи уьмуьрдин гьар са чIавуз
Куь сивел хъвер алаз хьурай.
Бичинчи яз никIевайла,
Ризкьид къадир рикIевайла,
Кар гзаф яз кIевевайла,
Куь сивел хъвер алаз хьурай.
Кьуьд, гад, гатфар, зул атайла,
Берекатлу дул атайла,
Куьнуьдизни кул атайла,
Куь сивел хъвер алаз хьурай!
Пашман йикъар такурай квез,
Чин ачух хьуй, рикIни хъуьрез,
Мезелийрал рахарла мез,
Куь сивел хъвер алаз хьурай…
Сада-садаз хуш рафтарвал
Авун я са арифдарвал.
Лугьудайла за авайвал,
Куь сивел хъвер алаз хьурай…
«Лезги газетдин» 2021-йисан 11-нумрадай.
