* * *
Профессоррин-инженеррин дестедиз самолетда аваз фин теклифна. Къулайдаказ ацукьайдалай кьулухъ абуруз и самолет чпин студентри туькIуьрнавайдакай хабар гана. И хабарди тажубарай профессорар-инженерар саки вири тадиз анай эвичIна. Анжах сад квачиз. Самолетда амукьай, секиндаказ вичин чкадал ацукьнавай профессордивай хабар кьуна:
— Куьн вучиз акъвазна?
Профессорди жаваб гана:
— Зун жуван студентрихъ тамамвилелди инанмиш я. Студентрин алакьунар чизвай за квез тестикьарзава хьи, и чун ацукьнавай ракьун тадарак цавуз гьатта экъечIни ийидач.
* * *
— Гьамид, хешил хапIа гьазур хьанва, неъ.
— Вуч хешил хапIа? Вуна бес шурва ргазвайди туширни?
— Тир. Амма арадал атайди са хешил хьтин гъуруш я ман.
* * *
Кьуд лагьай классда авай Гьасана бубадивай хабар кьазва:
— Буба, муаллимди математикадай ганвай тапшуругъ вуна гьяла ман. Зи кьил акъатзавач адай. Пара четинди я.
Тапшуругъдиз вил вегьейдалай кьулухъ кIеве гьатай бубади жаваб гуда:
— Ваъ, хва, ви патахъай за гьялун дуьз жедач. Ахпа ваз ксай месик иситIаяр кIан жеда.
«Лезги газетдин» 2023-йисан 38-нумрадай.
___________________________________________
Къаравилияр
* * *
— Гада, женжелвилер ийимир, тахьайтIа, ви бубадин кьилел рехи чIарар экъечIда.
— Зи буба гзаф шад жеда. Адан кьилел эсиллагь чIарар аламайди туш.
* * *
— Диде, къе мектебда чаз духтурри рапар язавай.
— Чан руш, ваз тIар хьанани? Вун шехьначни?
— Ваъ-э, диде, зун катайди я, абурувай зун кьаз хьанач.
* * *
— Я бала, вуна вучиз незвач? — хабар кьазва дидеди гъвечIи гададивай. — Вуна жанавурдиз хьиз гишинзава лагьайди тир.
— Диде, ваз жанавурди газар нез мус ва гьина акурди я?
«Лезги газетдин» 2025-йисан 7-нумрадай.
