Тади къачуз тахьурай!
Машиндин руль гъиле гьатай береда
Газ гана физ тахьуй а куь жуьреда,
Ахпа гьатда куьн акьалтIай кIевера,
Тади къачуз тахьурай, квез минет хьуй!
Машинд акьул гьар са касдин кьилева,
Писни хъсан Сад Аллагьдин гъилева,
Квехъ гьар садахъ паб-аялар, диде (а)ва,
Тади къачуз тахьурай, квез минет хьуй!
Гьар са касди явашара йигинвал,
Ахпа, стха, акьалт тавуй ифин вал,
Давам хьурай и уьмуьрдин ширинвал,
Тади къачуз тахьурай, квез минет хьуй!
Гзаф хьанва машинар чи рекьера,
Садрани куьн твамир четин кIевера,
Секинвал хуьх гьам хуьре, гьам шегьерра,
Тади къачуз тахьурай, квез минет хьуй!
Са чIавузни кьил-кьилелай алудмир,
Йифиз хквез, хизандин рикI акъудмир,
Ички хъвана, на вун гьалдай авудмир,
Тади къачуз тахьурай, квез минет хьуй!
Лугьуда хьи, йиф инсандин душман я,
Са чIавузни хизан тамир пашман яз,
КIанзава заз куьн къекъвена кIубан яз,
Тади къачуз тахьурай, квез минет хьуй!
Дидеяр куь хиялрик ква дерин тир:
«Яраб, бала, гьинватIа вун, ширин тир…»,
Сабурлувал я гьар садаз кьилинди,
Тади къачуз тахьурай, квез минет хьуй!
Саламат яз хуьх куьне куьн датIана,
Алай девир, писни хъсан кьатIана,
Аллагь рази хьурай чалай лагьана,
Тади къачуз тахьурай, квез минет хьуй!
КIанзава заз куьн гъавурда акьуна,
Гьар са кIвалах сабурдивди авуна,
Хизандиз куьн сагъ-саламат акуна,
Тади къачуз тахьурай, квез минет хьуй!
Дагъустан я гзаф миллетрин Ватан,
Хайи макан жедайди туш гьич такIан,
Гьар багъридиз багьа я къе куь рикI-чан,
Тади къачуз тахьурай, квез минет хьуй!
Жегьилар къе акьазвач зи гъавурда,
Эцягъизни кIанзавач куь хатурда,
Савадлу хьухь – уламдай рехъ жагъурдай,
Тади къачуз тахьурай, квез минет хьуй!
Сакията лугьузва квез рикIивай,
ЧIуру кIвалах эхиз жедач рикIивай,
Гьич садрани кефи тахаз вичикай,
Тади къачуз тахьурай, квез минет хьуй!
Гьаж мубарак
Вад лагьай шартI Ислам диндин
Гьаж авун я михьи рикIин,
Япараваз ван зикирдин,
Авунвай гьаж мубарак хьуй!
Ибрагьим расулдин хиве
Сад Аллагьди туна сифте,
Садра кьванни уьмуьрд къене
Авунвай гьаж мубарак хьуй!
Гьар са касди авай мумкин,
ШартI кьиле твах гьарда вичин,
Ватанда чи Пайгъамбардин
Авунвай гьаж мубарак хьуй!
Гьаждал физвай гьар са касдин
Мурад акун я пак мискIин,
Сурал фена Пайгъамбардин,
Авунвай гьаж мубарак хьуй!
Меккадавай Масджид-гьарам,
Сад Аллагьдиз ая икрам,
КIеви хьурай куь дин, иман,
Авунвай гьаж мубарак хьуй!
Арафат дагъ, Мина дере,
Куьн шейтIандин жемир геле,
Аллагьдин тIвар аваз рикIе,
Авунвай гьаж мубарак хьуй!
Куьн алатмир дуьз рекьелай,
Ферз алат тавуй рикIелай,
Кьабула чIал зи мецелай,
Авунвай гьаж мубарак хьуй!
«Лезги газетдин» 2023-йисан 51-нумрадай
