* * *

Эмин буба, лезги чIалал чан гъайи,

Чи манийрал гуьзел, ширин ван гъайи,

Мубарак хьуй ваз “михьи югъ” вун хайи!

Къарагъ кIвачел, вун чаз сагъ яз акурай!

 

Вун ава къе женнет багъда ахвара,

КIвал авуна Ялцугъарин сурара,

Ви рикI ама кузмай къени чIалара,

Ваз рагьмет хьуй, ви суруз нур атурай.

 

Ви гьиссерин ялавдиз зун гьахьзава,

Ви дерт чIугваз,  рикIикай нагъв кIвахьзава.

Кьил элкъвена, жувавай жув квахьзава.

Ваз хьиз зазни дуьнья душман тахьурай.

 

Эмин  буба, вун хьиз, зунни етим я,

Дивана я ви хтул, вун секин я.

Чан аламаз суруз гьахьун четин я.

Къванцин дагълар чеб вири зал чукIурай.

 

Йисар физва, гъамарив рикI цIуруриз,

Кьисметдини бахтсузвилив кьуруриз.

Сад Аллагьдиз кIанзава зун чуруриз.

Къуй багърияр вичин бахтлу авурай.

 

Я Ребби, ша ягъ рикIикай шишер зи,

Акъуд чинай буьркьуь хьанвай вилер зи.

Цуькведамаз кIвахьна чандин бегьер зи.

Саирата гьикьван и гъам чIугурай!

 

Фана дуьнья, заз жез, вакай низ хьана?

Эмин  хьтин фагъирар на куьз хана?

Дугъри ксар гъуцаризни пис хьана…

Бес чна низ арза-ферзе хъувурай?

«Лезги газетдин» 2018-йисан 28-нумрадай