Шеда чун

“Вич мурдарда булахдин яд рагъулна,

Дерт-гъам гайи дустар галаз шехьна зун”.

И дуьньядин сифте къванер эцигна,

Бегьер такур устIар галаз шехьна зун.

 

Етим Эмин, базарда памбагдилай

Кьезил хьайи гьулдан акваз шедай вун.

Тешвиш хьана, гьарда санихъ ялзавай,

Миллет акваз, инсан акваз, шедай вун.

 

Гьикьван къведа халкьдин кьилел къазаяр,

Кьил акъатдач ни-низ гузва жазаяр?

Кьиляй-кьилиз акахьнава дуьнья къе,

Къази вун я, за ваз гузва арзаяр.

 

Са асирда, са виш йисан тарихда

Кьадар хьанач халкьдиз эгъвей фурарин.

Къакъарамай гапурдинни тарифда,

Амма гъилер куьруь хьанва турарин.

 

Къе дамарра звал гъизва чи ивидал

Гьахъ авачир и дуванри, крари.

КIваче авай чи шиверин далудал

Къе игитар гуьзетзава пурари.

 

Гарар ава, чи тарихар зайзавай,

Сахта кьинер, чIалар акваз, шеда чун.

Диде Ватан кьве чкадал пайзавай

Паслу симер, цIарар акваз шеда чун.

 

Къакъудзава, чапхунзава халкьдин бахт,

Шаир, гила гьикI илгьамдиз къведа чун?

Чи гъилева зарул чIалан пашман тахт,

Ван-ванцеваз шиирралди шеда чун.

«Лезги газетдин» 2018-йисан 28-нумрадай