Рушар кIанда

 

Намус, гъейрат авай вине,

ТIвар-ван авай хуьре-кIвале,

Ватан патал зегьмет — рикIе,

Къастар авай рушар кIанда.

 

Хизандин сир хуьдай эркин,

КIубанвални ериш якъин,

Къадир чирдахъ элкъуьрдай чин,

Вафалу тир рушар кIанда.

 

Инсандиз хас алай партал,

Кифер куьрсна, тунвай патал,

Хатур-гьуьрмет вири патал

Къалурзавай рушар кIанда.

 

Чини, кIута алаз гъилел,

Зегьметдин сир аваз рикIе,

Чи Ватандин дамах винел,

Акъудзавай рушар кIанда.

 

Дуьньяд чиниз дувул гайи,

Чи несилриз акьул гайи,

Адет тарих вине хьайи,

Заз дагъвийрин рушар кIанда…

 

ХьанайтIа

 

Зун бахтавар тир уьмуьр амай кьван,

Шаир ваъ, закай булах хьанайтIа.

КьетIен къванерал илигдай за чан,

Жув дагъдин хура яйлах хьанайтIа.

ТиртIа са ферли кIвалахдин устIар,

Хкаждай виниз зегьметда зи тIвар.

Йиф ийидай за югъ хьиз бахтавар,

Рагъ зи хиялдив уртах хьанайтIа.

Заз авачиз туш шиирдин къадир,

Акьулдин емиш чIалан бафта тир.

ХупI хъсан жедай гьулдан яз шиир,

Гафарни цIай гъидай чахмах хьанайтIа…

«Лезги газетдин» 2020-йисан 45-нумрадай