РикIера нур, шадвал хьурай…
Назила Магьмудова. Краснодардин крайда яшамиш жезвай и рушан, пуд веледдин дидедин ери-бине Кьурагь райондин Аша-рин хуьр я. Адан буба Мегьамед Жабраилова (рагьмет хьурай вичиз) хейлин йисара лезги чIаланни тарихдин муаллим яз мектебда кIвалахна. Диде Жамината хуьруьн ктабханада зегьмет чIугуна. Культпросветучилище акьалтIарнавай Назила Магьмудовади фадлай хайи чIалал шиирар кхьизва. Интернетдин майданра жегьил автордин тIвар фадлай машгьур ятIани, “Лезги газетдиз” адан шиирар сифте яз акъатзава. Хайи чIалал гьакьван ашукь Назила Магьмудовадихъ яратмишунрин рекье еке агалкьунар хьун чи мурад я.
_______________________________________________________________________________________________________________________
Аллагьдикай куьмек хьуй
Гьикьван руьгьдиз агъур я,
Дерт хьана рикIиз.
Ви ширин чан гьазур я,
Вил атIуз, рекьиз.
Гьикьван жеда, бес тушни…
Амач захъ аман.
Килиг жуван уьмуьрдиз
Ва буйдиз кьакьан.
Жедач гила ваз я чан,
Садакай куьмек.
Хквезмач ваз я зи ван,
Ахквазмач ваз «экв».
Минет хьуй ваз, садра кьван,
Килиг цавариз.
Тахьуй ви рикI, чIулав къван,
Маса рикI тIариз.
И дуьньяда гьар са югъ
МичIи я ваз лап.
Аллагьдихъ, чан, вун агъугъ,
Ая вуна капI.
Вилерилай накъвар физ,
Дарих хьанва зун.
Чи дердериз, Сад Аллагь,
Дарман хьурай вун…
Кьуьгъуьрни жанавур
ЭкъечI лугьуз къе майдандиз,
Дили хьанва вун.
Кьуьгъуьр ятIан, гьа ви чандиз
Къведай хьи лап зун.
Югъди-йифди на садазни
Гузвач хьи ахвар.
Гишин хьайла, гьа вадазни
Яда на кIасар.
Вуч кичIерар гузва вуна,
Къув ягъиз йифиз.
Ша зи патав юкъуз, кьуна
Тум тIарам, кIевиз.
КичIе туш заз гьич вахъайни,
Я ви сивихъай.
СикIрен гъил на яхъ хъуьчIуькай,
Ахпа рикI ахъай.
Вучда вакай хьана ахьтин
Жанавур кьецIи.
Я мез тахьай ширин, михьи,
Сарар жен хци?
Жуван цацар акIурда за
А хамуна ви.
Гудач за ваз пара жаза,
Авахьда иви.
Ви кьил за гьич кьадач, ахмакь,
Айиб тушни ваз.
Тежер кIвалах вавай, нагьахъ
Лугьузва на заз.
Дишегьлийрин сувар
Икьван гуьрчег мартдин юкъуз
Дишегьлийрин ава сувар.
Мубаракрай вирибуруз,
Чан дидеяр, вахар, сусар!
Гьич садазни тахьуй гъамар,
Жумарт тир рикI хьурай къене,
Гьардан чилел цуьквед рухар,
Женнетдин багъ хьурай кIвале.
РикIер вири ачух хьурай,
Ахъа хьурай куь суфраяр.
Агалкьунар артух хьурай,
Бахтлу хьурай балаяр.
Ислягь хьурай гьар садан кIвал,
Дидеярни чи сагъ хьурай.
Акъатрай куь чандавай тIал,
РикIера нур, шадвал хьурай …
«Лезги газетдин» 2020-йисан 47-нумрадай.
___________________________________________________________________________________________________
