Ичинрин хуьр

Акур инсан гьейран жеда

РикIиз чими Ичинрин хуьр!

Вун дердиниз дарман жеда,

Гъед хьиз экуь Ичинрин хуьр!

 

Емиш гъидай ава багълар,

Яйлахарни кьакьан дагълар,

Кьилел хьурай даим нурар,

Девлет авай, Ичинрин хуьр!

 

Кьуьзуьбур я хуьруьн дамах,

Чидай гьар са сенят, кIвалах,

Вун я мягькем руьгьдин даях,

Гьуьрмет авай, Ичинрин хуьр!

«Лезги газетдин» 2021-йисан 16-нумрадай.

________________________________________

КIири булах

Авахьзава булахдай яд,
Михьи я ам гьамга хьтин.
Булахдикай лугьуз баяд,
Ачухда за сирер рикIин.

Ашукь жезва булахдал югъ,
Багъишзава ракъини нур.
Ийизвай жемятдиз къуллугъ
Ам дагъларин язва абур.

Михьи булах, КIири булах,
Даим я вун дири, булах.
Икьван серин, икьван ширин
ГьикI ийидач за вал дамах?!

Лезги чилел алай вири
Булахра яд аваз хьурай!
Лезги халкьдин гьар мярекат
Берекатар галаз хьурай!

«Лезги газетдин» 2021-йисан 44-нумрадай