Марал

 

Экуьн кьиляй сегьер-сегьер къарагъна,

Къекъведа вун къачуз зирек кам, Марал.

Тик кьилелай келегъа ви эляна,

Зун куьз тада къачуз залай кам, Марал.

Бахтавар я Аллагьди вун гайиди,

Ви хуш рахун, къилих иес хьайиди,

Дуьньяд девлет санал кIвализ гъайиди,

Я бахтарив ацIанавай кIам, Марал.

Пехил жеда къвед на къачур камарал,

Лув гуз кIан я заз вун къекъвей кIамарал,

На гъил алтад Рухун Алид гъамарал,

Гьар майвадин къелемарин там, Марал.

 

Фена

 

Зун айвандал ацукьнавай,

Зи виликай суна фена.

Дурнади хьиз кьуна тик кьил,

Са назлу яр, бала фена.

 

Акур чIавуз чIулав вилер,

Гьарнихъ катна рикIин дердер,

Дамахдивди къачуз камар,

Таза къветрен пIарла фена.

 

Малаикар жедир гьейран,

АкунайтIа а гуьзел чан,

Дагъда битмиш хьайи емиш,

Дад тагана, катна фена.

 

Али, тербет це вилериз,

Текъведайла затI гъилериз,

Ви рех янавай чуру акваз,

Суна ви чан кана фена.

 

Куьз хъел я вун?

 

Куьз хъел я вун, я беймирвет,

Заз дуьнья агьузар ийиз,

Чи арадай квадриз гьуьрмет,

Зи, факъирдин, рикI тIар ийиз.

 

Алагуьзли, вуч я ви къаст?

Яргъарилай жез вун заз раст,

Зи кьве вилив кьаз туна пас,

Икьван гуьгьуьл зи дар ийиз.

 

Хажалат гуз на заз дарья,

Зи чан-уьмуьр хьуриз зая,

Муьгьуьббатдал лацу сая,

Вуна чIулав рангар ийиз.

 

Рухун Али ви гьасретдай

ЭкъечIзава мал-девлетдай,

Ваз за авур хуш суьгьбетдай

Масадбуруз на шар ийиз.

 

Вун хвашкалди

 

Яру магьсин винел чапатI,

Аста камар, вун хвашкалди,

Зи ракъибдин мурадар кьатI

Ийир къастар, вун хвашкалди.

 

Чуьлдавай къвед, гьарнихъ килиг,

Зи ашкъидал къелем илиг,

Зи гардандихъ ви гъил гилиг,

Эй нугбагьар, вун хвашкалди.

 

Акуна заз дустар пара,

Виже къведач хьурун чара,

Рухун Алид дердер чара,

Табагъдин чар, вун хвашкалди.

 

Гьинава жал?

 

Бади, саба, дад я ваз са хабар це,

РикIиз умуд, зи гуьзел яр гьинава жал!

ЦIай къекъвезва зи жигерда, тади (а)я,

Закай яргъаз хьайи дидар гьинава жал!

 

Ашукь тир зун адан гуьзел камарал,

Назик-назик ширин рахай гафарал,

ЭкъечIайла бязи вахтар къаварал,

МикьнатIис хьиз зи рикI чIугвард гьинава жал!

 

Акур чIавуз зи рикI, намус гваз фидай,

Са тавассум зи жигерда таз фидай,

Жейранд тегьер кьве кIвачик звер кваз фидай,­

Куьтягь тежер рикIин бизар гьинава жал!

 

Квахьай

 

Межлисдавай ярар-дустар,

Зун заргар я, гевгьер квахьай,

Яр паталди авур къастар,

Эвез яз кьил, жигер квахьай.

 

ТупIар шуькIуь, беден шумал,

Хъуьхъвен кьилер зулун чумал,

Чинлай нур гуз алмасдин хал,

Тамашдай кьван вилер квахьай.

 

Гьикьван вахт я хьана яргъаз,

Зи яр фена масдав рахаз,

Заз лугьуз: вун яргъаз акъваз,

РикIин мурад, бегьер квахьай.

 

Ваз хабар я, къадир Аллагь,

Зи ашкъидиз яр хьуй панагь,

Зи гъам-хифет ая куьтягь,

Зун Али я, дидар квахьай.

 

Регъуьхбан

 

Алдатмишиз кесиб яркIар,

Амалар ква вак, регъуьхбан,

Аквазва заз, бед я ви кар,

Квач ви сивик рак, регъуьхбан.

 

Шагьаддикай хьурна зирба,

Секлемдилай хейлин зурба,

Раж регъвез фейла араба,

Вахкуз са тапрак, регъуьхбан.

 

Цава туна на регъуьн къван,

Хъучен гьар къуз ийиз кьакьан,

ГуьтIуь хьуй ваз сурун лакьан,

Вакай хьуй са вак, регъуьхбан.

 

Алид гафар кьамир ужуз,

Вири хьиз ам хьурна ажуз,

Кьейла кьисмет тахьуй ваз жуз,

Дуьа, игьсан, як, регъуьхбан.

 

Регъв

 

Квахьна акьул, ви патав зун атана,

Авуна хьи вуна зун пис бизар, регъв,

Ажуз хьана, вуна ви зур къалана,

Кутуна хьи на зи чандик азар, регъв.

 

Тухвая хьи зегьле гъургъурд ванери,

Чеб туьтуьхдай рахар, элкъвей къванери.­

Экъис хьана кьецIил яхун къуьнерни,

Цаз-цаз хьурна зи рехи тир чIарар, регъв.

 

Иниз атун хьая хьи заз зиян,

Яхунарна хажалатдин парци чан.

Гьар са пата туна тIилид чIуру ван,

Биши хьурна вуна Алид япар, регъв.

«Лезги газетдин» 2021-йисан 16-нумрадай

__________________________________________________________________________________