“Лезги газет”
“Лезги газет” хтай чIавуз
Шад жеда заз лап кьадарсуз.
Адан цIарар кIелдай чIавуз
Акъатда зи гьевес цавуз.
Гьар гьафтеда хемис юкъуз,
Зи вил, дустар, рекьел жеда.
Газет мус хкведа лугьуз,
Вилив хуьз зун гъенел жеда.
“Лезги газет” заз багьа я,
Зи дердинин ам дава я,
Зи илгьамдиз ам гьава я,
Гьакьван кIани “Лезги газет”.
КIелзава за хайи газет,
Лезги чIалаз ийиз гьуьрмет.
Гегьенш рекьер хьуй ваз кьисмет,
Гьакьван кIани “Лезги газет”!
«Лезги газетдин» 2020-йисан 42-нумрадай
________________________________________________________________________________
ТIал
Я Сад Аллагь, зи чанда са тIал ава,
Адакай тек са зазни Ваз аян я.
Ваз куьмек це лугьуз, мецел чIал ала,
Шикаят туш, тIал инсандиз залан я.
ЯтIани зун Ваз са кIусни аси туш,
Ви гьар са кар чун паталди регьим я.
За лугьудач, зун кьадардал рази туш,
На гайидал зун рази хьун лазим я.
Тек са Вакай чара жеда зи чандиз,
Кьезил ая Вуна зи тIал, минет хьуй.
Жаваб гуда На тIалабай инсандиз,
Къуй и цIарар зи дуьадин суьгьбет хьуй.
“Лезги газет”
“Лезги газет” хтай чIавуз
Шад жеда заз лап кьадарсуз.
Адан цIарар кIелдай чIавуз
Акъатда зи гьевес цавуз.
Гьар гьафтеда хемис юкъуз,
Зи вил, дустар, рекьел жеда.
Газет мус хкведа лугьуз,
Вилив хуьз зун гъенел жеда.
“Лезги газет” заз багьа я,
Зи дердинин ам дава я,
Зи илгьамдиз ам гьава я,
Гьакьван кIани “Лезги газет”.
КIелзава за хайи газет,
Лезги чIалаз ийиз гьуьрмет.
Гегьенш рекьер хьуй ваз кьисмет,
Гьакьван кIани “Лезги газет”!
Балайриз
Таза, иер цуьквер я куьн,
ЦIийи вацран эквер я куьн,
Экуьн кьиляй хуш рахадай,
Чан балаяр, нуькIер я куьн.
Алукьнавай гатфар я куьн,
Ракъин чими нурар я куьн,
Пашман легьзе шад хъийидай,
Чан балаяр, сувар я куьн.
Сефил гуьгьуьл ачухарда,
КIвале шадвал артухарда.
Аламатдин гъетер я куьн,
Мелер я куьн, мехъер я куьн.
Яргъи уьмуьр кьисмет хьуй квез,
Сад Аллагьди нуьсрет гуй квез,
Девлет хьуй квез, гьуьрмет хьуй квез,
РикIиз кIани чан балаяр!
“Къурушрин сес”
Шумуд йис я акъатиз вун,
Гьар вацра зав агатиз вун,
Вакай, газет, рахазва зун,
“Къурушрин сес”, “Къурушрин сес”.
Хуьруьн хабар гузва на заз,
КIвализ шадвал гъизва на заз,
Шумуд йис я вун хкиз чаз,
“Къурушрин сес”, “Къурушрин сес”.
Зак гьевесар артух кутаз,
КIелиз лезет гузва жуваз,
Вун гьамиша чахъ хьуй аваз,
“Къурушрин сес”, “Къурушрин сес”.
“Къурушрин сес” — рикIиз масан,
“Къурушрин сес” — кIвалин мугьман,
Сугъулвилиз я вун дарман,
“Къурушрин сес”, “Къурушрин сес”.
Рахана къе вакай зи мез,
“Къурушрин сес», “Къурушрин сес”.
Кутурвиляй на зак гьевес,
“Къурушрин сес”, “Къурушрин сес”.
«Лезги газетдин» 2020-йисан 50-нумрадай.
_________________________________________________________________
Лезгистандин булахар
Лезги чилел гзаф ала булахар,
Чи дагъларин, чи вацIарин даяхар.
Къуй булахра яд аваз хьуй датIана,
Такурай чаз са чешмени кьурана.
СикIрен булах — яд начагъдаз дарман я,
Эльдер булах — гьакьван рикIиз масан я,
Шамгъал булах — яд лап мурк хьиз къайи я,
Багъир булах — рикIиз гьакьван чими я.
Бубад булах — дагъларава КIиридин,
Бейбут булах — цихъ дад ава пIинидин.
Кпул булах — начагъди сагъ хъийидай,
ПIирен булах — дава-дарман ийидай.
Хандин булах — тарих ава чIехи тир,
КIелед булах — хуьруьнбуруз вири тир.
Чамран булах — кIани рикIер садзавай,
Лезги булах — ви тIварцIи зун шадзава.
Лезги чилел булахар къуй бул хьурай!
Берекатар, бегьер гудай зул хьурай!
Чи булахар къуй асирра рахурай,
Абур даим яд аваз чаз акурай!
«Лезги газетдин» 2021-йисан 14-нумрадай.
___________________________________________________________________
Кьве чин алайбуруз
Кьве чин алатIа, жед кьве мез.
Ви гуьгъуьна рахаз жеда,
Фитне даим мецел элкъвез.
Таб ихтилат аваз жеда.
Квезни акуна жеди абур,
Авайди туш чпихъ абур.
Фитнедив кьацIурда вири,
Чидайбур туш мукьва-кьили.
Нер тваз гьарна хупI къекъведа,
Вич затI тушиз, вал хъуьреда.
Табда вичин хийир патал,
Тахсирарни илитIда вал.
Ви чинал тарифар рахаз,
Гуьгъуьна вун жеда жакьваз.
Ихьтинбуруз жемир сирдаш,
Са чIавузни кьамир юлдаш.
Лап писбур я чеб хесетриз,
Шерик жеч гьич дуьз суьгьбетриз.
Гьардаз вичин пис хесият,
Чир хьайитIа, зун рази я.
«Лезги газетдин» 2021-йисан 31-нумрадай.
____________________________________________________________________
“Лезги газетдин” — 100 йис
* * *
Лезгистандин нур чирагъ, зи “Лезги газет”,
Ваз чIал кхьиз шад язва зун пара, гьелбет,
Вун — зи акьул, зи руьгь, гуьгьуьл, чIехи девлет,
Рекьидалди кIелда за вун, тушиз зегьмет.
Дуьньядин хабарар гваз атайла суфрадал,
Зун шадвиляй акъатда ирид ьцаварал.
КIелна куьтягь тавунмаз, эцигиз жеч вун чилел,
“Лезги газет” кIан я заз диде хьиз хайи.
Мад виш йисар уьмуьр хьурай вахъ, газет,
Яшамишрай ви чIал, ви руьгь чи кIвалера,
Вакай, азиз, рахуналди тух жедач зун,
“Лезги газет” булах я михьи яд авахьзавай…
Кьведар
ЧIуру ният авайдакай дуст жедайд туш,
Чиркин гафар рахаз, гьалтда вал нахуш.
И девирда зиреквал тавуртIа,
Дуст кас, вун кьулухъ галамукьда.
Йисалай-суз дуьнья жезва ьлап чIур,
Са бязибурухъ авач гьич сабур.
Сада гъанва лап еке руфун,
КIаник — багьа машин, гъиле — багьа телефон.
Ажуздавай кар хъжезмач хийирдин, —
Тамаш, дустар, атанвай куьн девирдиз.
Бурж къачузва, вахкун тийиз ачухдиз,
Бес вуч лугьун ихьтин черпел къудухдиз?
Интернетда муьгьуьббатдихъ къекъвезва,
Я ахмакь кас, ви акьул бес гьинава?
Сад дуьзена я, сад сикI я,
Сад шад я, сад датIана гъарикI я.
Чинал къвазна, салам гузва,
Кьулухъай вун няс жакьвазва.
Хуьруьнвидиз хъийизмач гьуьрмет,
Намуссузбур гзаф хьанва, гьелбет.
Жувандакай ийизва айгьам,
Патанбурув вугузва дам.
Са бязибурухъ ава суфатар,
Аламат жеда акур килфетар.
Зайифди акваз, хьайиди дири,
Кьегьал акунни жезва лап къуьруь…
* * *
Са бязибуру бязибуруз гуда мез,
Каци хьиз къатадда, вилик къвез.
Еке-еке саламар гуз, къуьнерихъ гъилер вегьез,
Бязибур акурла, кIан жеда жуваз хъуьрез.
Эй дасмалчияр, са кIус регъуь тушни квез?
Садбур такурдан кьасарда, анихъ элкъвез.
Садбур акурла, кат хъийиз гъенез,
Бязибуруз кIанзава вилералди нез.
Дуьз инсан чIуриз алахънава, къекъвез.
Ихьтинбурукай хьанва зун мерез.
Са бязибур ухшар я къе шейтIандиз,
Ацукьун-къарагъун гьич чизмач чпиз.
Бязибурун сивер элкъвенва хъуртариз,
Жуванбурухъ галаз чIуру чуртариз…
«Лезги газетдин» 2021-йисан 33-нумрадай.
_________________________________________________________
Лезги мани
Аялзамаз пара зи рикI
Манийраллаз хьана чIехи.
За манияр гьевесдивди
Тамамарда, шадиз вири.
Алукьайла чими гатфар,
Хурал кьуна ашукьдин тар,
Хуьруьн къене межлис пайгар
Кьиле тухуз кIанда рикIиз.
Лезги мани, лезги мани,
Кьабулда вун шаддиз рикIи.
Вахтар ва инсанар
Вахтар ва инсанар къвез физва,
РикIе гьайифвилин гьиссер амукьзава.
Хъсан инсанар фад къакъатзава,
Аламатар акваз, беден са жуьре жезва.
Вахтар ва инсанар гзаф дегиш хьанва,
Са бязибур лап къизмиш хьанва.
Тербия амач, чIуруз вердиш хьанва,
Са куьнал ятIани ахмиш хьанва.
Вахтар ва инсанар хьанва хьи пехъи,
Гафар-чIалар чида чпиз икьи-икьи.
Чуруяр акална яргъи-яргъи,
Ихьтинбур акваз, ргада иви…
ЧIехи ктаб
За и ктаб авуна заказ,
Гзаф затIар чир хьана заз.
Гьаким Къурбан, баркалла ваз,
ЧIехи ктаб багъишна чаз.
И ктабда ава вири,
Аферин ваз, лезги хва чи.
Еке тир зегьмет къачуна,
Ктаб майдандиз акъудна.
Адаз къимет гун четин я,
Мана-метлебдиз дерин я,
КIел тавур югъ заз серин я,
Авайди вуч экв, зигьин я!
Рустама квез гана къимет,
Ктабдикай я зи суьгьбет,
Тушни ам чаз чIехи девлет!
Гьаким Къурбан, сагърай, гьелбет.
Хъсан я
Ша лагьайтIа са чкадай,
Геж тавуна, фин хъсан я.
Ана жуван абур хвена,
Эхдай кьадар тIуьн хъсан я.
Инсанвал ваз кIандатIа ви,
Суфатдал са чин хъсан я.
Гьар чкада рикIел алаз,
Жуван абур хуьн хъсан я.
Мехъерикни, абур хвена,
Намуслуз къекъуьн хъсан я.
Эрекьар хъваз, русвагьбурал
Ягьанат, хъуьруьн хъсан я.
Кимеллайдаз салам гана,
Жув чирна, секин хъсан я.
Алакьзамай кьван ви кIвалихъ,
Ватандихъ гелкъуьн хъсан я.
Коронавирус
Вилериз таквадай, эй душман,
Шумуд касдин акъудна чан.
Чи гьар са югъ авуна пашман,
Коронавирус, алат чалай!
Ковид-19, чIуру вирус,
Шумуд инсан фена суруз.
Чав кар тазвач кьиле тухуз,
Маска патал ава кукIуз…
ЧIехи бубадиз
ЧIехи бубад авурди я чубанвал,
Шагь яйлахар адан кIурук кваз хьана.
Чанда аваз малдарвилин кIубанвал,
Баркаллу тIварни адал алаз хьана.
Югъди йифди дагъ-аранда
Шалам алаз къекъведай.
Суьруьйрихъ ам колхоздин
Лап рикIивай гелкъведай.
Гъиле аваз чумахъ лаш,
Къуьне аваз фу, чанта,
Туьтег ягъиз ашкъидалд,
Уьмуьр тухвана ватанда.
Гагь акатдай марфарикни къаярик,
Цава — къукърум, цIайлапанар рахадай.
Чуьнуьх хьай туш чIехи буба валарик,
Дурум гана, суьруьд япал аквадай.
Виридалай четин дулдин береда
Сабурдалди кIел-хеб садиз, яваш тир.
Йиферизни ятахрал гьар вядеда,
Къаравулчи язни, ам лап дирибаш тир.
Хасай буба тир вичин тIвар,
Суьгьбетрал рикI алай кас тир.
Намусдивди ийидай кар,
Хуьре адаз дамах хас тир.
Рагьмет хьуй ваз чIехи буба,
Зегьмет чIугур акьван зурба.
ЧIехи бадедиз
Чи чIехи бадеди чивекар храдай тир,
Невейрин кIвачериз чими хьурай лугьуз.
Ада тIанурда фу чрадай тир,
ТIунутIар чи гъиле вугуз.
Чан бадедин бицIи балаяр лугьуз,
Чав милайим рахаз, гьевесар кутадай.
Бадеди садрани авур туш кьил агъуз,
Вичелайни гьар са кар алакьдай.
Зегьметдал рикI алай адан гзаф,
Гьич садрани къачур туш чарадан гаф.
Аял тиртIани зун лап гъвечIи,
Зи рикIел хъсандиз алама баде чи.
Эсина баде тир адан тIвар,
Хуьре виридаз тир ам ашкар,
Ваз виш агьзур рагьмет хьуй, чан баде,
Ваз за и шиир багъишзава къе.
«Лезги газетдин» 2021-йисан 50-нумрадай
___________________________________________
Гатфар
Ракъинин чими нурар гваз,
Цуькверив ацIанвай багълар гваз,
Ачух михьи цавар гваз,
Гьуьрметлу дустар, гатфар къвезва чаз.
Ашукьдин хурал тар рахаз,
Жегьилар “Лезгинкадал” къугъваз,
Назик хъуьтуьл шагьвар гваз,
Гьуьрметлу дустар, гатфар къвезва чаз.
8-Мартдин, Яран суварар гваз,
Дишегьлийрин рикIер шад яз,
Рустаман тебрикар гваз,
Гьуьрметлу дустар, гатфар къвезва чаз.
Дагълара чубарукар, билбилар рахаз,
Манидарар хуш манияр гваз,
Рустаман цIийи шиирар гваз,
Гьуьрметлу дустар, гатфар къвезва чаз.
«Лезги газетдин» 2023-йисан 11-нумрадай
___________________________________________________
Рамазандин варз
Аллагь, за вун патал сивер
Хуьда, каш гуз руфуниз.
Гунагьрикай михьи рикIер
МуьтIуьгъ я ви гафуниз.
Гьар са касди авай иман
И ферз кьилиз акъудда.
Мугьман хьанва пак рамазан
Чалай парар алуддай.
Сивер хвейдаз жеда суваб,
Ният кьилиз акъатда.
Ви дуьадиз гуда жаваб,
Сефилвилер алатда.
Къуй вирида хуьдай сивер
Кьабулрай Сад Аллагьди!
Абад хьурай хуьрер, кIвалер,
Пар кьезил хьуй гунагьрин!
«Лезги газетдин» 2023-йисан 12-нумрадай
______________________________________
Фонтандиз
Чар гьавизни хуш я рикIиз,
Багьа жеда лап къизил хьиз.
Кьуд патаз на яд чукIуриз,
Къуй хьурай вун рахаз, фонтан!
Няни хьайла, хважамжам хьиз,
Аквада вун лап гуьзелдиз,
Ухшар хьанва хуьр женнетдиз,
Вун себеб яз, гуьзел фонтан.
Аллагь рикIел алайбуру
Гьарда вичин кутунва пай.
И гуьзел чаз бахшай фонтан
Куь виридан чанар сагърай!
И пак вацра берекатлу
Атанва зун яз гьевеслу,
Къашарилай лап шафакьлу
Ваз шиир гваз, нурлу фонтан!
«Лезги газетдин» 2023-йисан 38-нумрадай
