Ватан
Зи кьил ястухдал (а)ла, вилерни рекье,
Вун паталди зи чан кузва, эй Ватан.
Гъурбатда гьижранд(ин) хер хьанва рикIе,
Зи вилерай иви физва, эй Ватан.
Ватан авачирди амансуз жеда,
Хажалат чIугуна, имансуз жеда,
Жерягь жагъин тийиз, дармансуз жеда.
Зи дердинин дарман вун я, эй Ватан.
Мазали Алидиз кIанда шадвал, хъвер,
Намерддин, хаиндин акъатрай вилер.
Ажалди ина зи туьд кьуртIа эгер,
Зи рикIин эрзиман вун я, эй Ватан.
Намерддиз
Эй инсанар, за квез ийин эрзи-гьал:
Гьиллени таб я гьар са кар намерддин,
Жагъич адан кIваляй са кIус фу гьалал,
Гьарамди я кIулавай пар намерддин.
Зимбил кIатI я, хуьрек мухан лаваш я,
Аллагьдиз негь, шейтIандин ам юлдаш я,
ЯкIуз къимиш текъвез, кIараб кармаш я,
Терг хьуй сивяй вири сарар намерддин.
Намерддиз гьич куьмек ийиз кIан жемир,
Гьикьван ада гьараяйтIан, ван жемир,
Ахьтиндакай дуст кьадай инсан жемир,
Кьезил тахьуй рикIин азар намерддин.
Гатуз яйлах, хъуьтIуьз къишлах кьаз макан,
Алахъда ам хуьз анжах са вичин чан.
Кар я, кIвализ атун хьайитIа са мугьман,
Вилерилай фида накъвар намерддин.
Кьейилани, таб алатдач мецелай,
Цацар кими тахьуй адан къецелай,
Байкъушдин ван яваш тежез варцелай,
Зулумат хьуй гадни гатфар намерддин.
Зун Мазали Али я, гьахъ рахада,
Фу балкIандал хьурай, намерд — пияда,
Са ягьсузни тамукьрай и дуьньяда,
Квахьдайвал чи нугъатдай тIвар намерддин.
Хандиз
Ханди чаз къе авуна кар,
Къуй виридаз хьурай хабар,
Алай пекер тирла кукIвар,
Кьилди кIвализ мугьман хьана.
Зал чухва-затI ала лугьуз,
Юкьва чIулни ава лугьуз,
Девлетлуд ни гала лугьуз,
Зун гьуьрметлу инсан хьана.
Зунни мирес, арада цал,
Хуш туш рикIиз куьн авай кIвал,
Куьн шад яни къенин йикъал,
Акатайдаз девран хьана.
Къугъвазмач зи сазунин сим,
Хандин кIвале тийир регьим,
Фикирдиз гъиз Мацарин ким,
Алини курпашман хьана.
«Лезги газетдин» 2020-йисан 39-нумрадай
__________________________________________
Жемятдиз
Хейлин вахт тир ашукь яз чун рикIивай,
Амма кIеви цаз хьана чи рекьеллай,
КIани рушахъ галаз уьмуьр тухудай
Кесибвили рехъ ганач заз, жемятар.
Низ хабар тир кьве жегьилдин рикIикай,
Низ къайгъу тир хуьре и сес хьуникай?
Вилер акъат тийиз кIанид гуьгъуьнай,
Амазма зун кьурайди хьиз, жемятар.
Гьикьван кузва зун хьтинбур икI чарада,
Фекьид, фалчи жерягьди, гьакI масада,
Юзбашидин зунжур гъиле авайда
Яшамиш жез вугузвач чав, жемятар.
Зилиди хьиз, фугъараяр фитIиндай,
Муьфтехурар мус акъатда арадай?
Куьгьне — эксик адетарни лап тергдай
Алидиз гьа югъ аквач жал, жемятар.
Жегьилриз тавакъу
ЯхцIур балкIан хьуй са жуьре,
Вири гьатна атуй рекье,
Къачудай хьиз Къубад къеле,
Зи дердиниз дарман атуй.
Хайи ватан вилериз зи,
Пай таххьайтIа уьмуьрдиз зи,
Хабар це фад эллериз зи,
Зун кьабулдай карван атуй.
Гъурбатда заз амач мумкин,
Гьарайдиз ша, жегьилар, куьн.
Акун патал къамат хуьруьн
Зи багърияр мугьман атуй.
Алидин гьал чIуру я лагь,
Саз кьур гъилер кьуру я лагь,
Зун, ватан, вал кьару я лагь,
ЯхцIур жегьил-жаван атуй.
«Лезги газетдин» 2022-йисан 30-нумрадай
