Азиз Ватан
Вахъ авай кьван гуьзел шартIар
Алахъда зун чириз, Ватан.
Ви илимдин кьетIен тарсар,
Зун ашукь я, кIелиз, Ватан.
Либас-пекдин ва атIласдин,
Нур гузва на хам алмасдин,
Килигайла гьар са касдин,
Хъуьреда вун чиниз, Ватан.
Нихъ жеда вун хьтин диде,
Чан рикI алай хайи уьлкве!
КIанивили вун зи рикIе
Кьунва бине кIевиз, Ватан.
Серф авурдаз вичин зегьмет,
Ийида на гзаф гьуьрмет.
Вегьеда на ви мал-девлет,
Вири гьадан рекьиз, Ватан.
Вич дуьньядин халкьдиз керчек,
Адалатдин чIехи дестек,
Москвадай куькIуьрай экв,
Аватна гьар пипIез, Ватан.
Хийирлу туш архайинвал,
Гьулдандин цал чIугу жувал,
Ягъидин гъил тагакьдайвал,
Мад хкаж хьухь виниз, Ватан.
Икьван къени гьайбатлу зур,
Ваз суварар хьуй виш, агъзур.
Шаир Нури язва гьазур,
Темен гуз ви сивиз, Ватан.
1955
Гьайиф я заз
Гьайиф я заз, дерт ава зи
РикIе дерин гьуьлерлай.
Лейсан хьана физава зи
Гъамлу накъвар вилерлай.
Яб акализ, бенд хьана зун,
Зи лал хьайи чуьнгуьрдихъ.
Дерт ала зал, шехьзава зун,
Зи бегьерсуз уьмуьрдихъ.
Са бязибур, гуз заз салам,
Бахт лугьуз зав, луькIвезва.
Зун вуч ятIа, тийижиз ам,
ИчIи гъил гваз хквезва.
Эл физвай муькъуьн кьиле
Жув са гъвечIи къван хьана,
КьенайтIани къайгъу тушир,
“Ава”, лагьай ван хьана.
Шад жедайвал килигдайбур,
Хур вегьена парудлай.
Зи мегьрибан чIехи халкьдиз
Рехъ жедай зи хурудлай.
1965
Дяве кIандач
Ислягьвилин бахтлу рекьиз
ЧIугваз мягькем камари,
— Дяве кIандач! — гьарайзава
Элдин дерин къатари.
Дяве лагьай гаф гьар тегьер
Дуьньяд ашдик зегьер я.
Вашингтондин агъайриз ам
Гуя са мел-мехъер я.
Дяве кIанид килиграй зи
Бадед рикIин тIеквенриз.
Дявед дерин хирернавай,
Зи имийрин беденриз!
Дяве кIанид килиграй зи
Дидед чIулав вилериз.
Адан чинлай язух накъвар
Сел хьана фей гелериз.
Чи сесиниз гузва сесер
Инсанперес дустари.
Дагъдин кукIвал, дагъ эцигда
Халкьдин къати къастари.
Алем секин хьун паталди
Ислягьвал хьуй кIевелай.
Дявекарар барбатI хьурай
Чи тарихдин рекьелай.
1946
Играми шаир Сулейманаз
Гьайиф , завай хьанач акваз,
Хьанач вав рахаз, Сулейман.
Ракъурна за саламар ваз,
РикIин сидкьи яз, Сулейман.
Вун сагърай, дуст, яшамишрай,
Агъзур йисар вал дуьшуьшрай.
Ви зегьметди багъ битмишрай,
Гьуьлуьн лепе гваз, Сулейман.
Акъатна дуьньядиз ви тIвар,
Марифатдин авай гьунар,
КIелиз течиз алакьун кар,
Аламат я заз, Сулейман.
Ви чIаларихъ ава гьайбат,
Вав гва, дуст кас, чIехи девлет,
Горькийдини авур гьуьрмет
Мубарак я ваз, Сулейман.
Вилелд(и) акур гьалар куьгьне,
Фикир-дерин, акьул — дегьне.
Медениятдин цIийи рекье
Мад мягькем акъваз, Сулейман.
Писни-хъсан чидай ариф,
Вун агьил жез тушни гьайиф.
Нуриди ви ида тариф,
Хуруз чIугваз саз, Сулейман.
1934
Дагъустан
Чан зи гуьзел, гуьрчег Ватан,Дагъустан,
Ви гуьзелрин чIулав вилериз къурбан.
Вун я чи багъ-бустан, сагърайви багъбан,
Ви яйлахрин алван цуьквериз къурбан.
Килигайла а ви накьан тегьердиз,
Гьич гаф амач и ви къенин тегьердиз.
Ухшар я къе ви гьар са хуьр шегьердиз,
Вун гуьнгуьниз гъайи гъилериз къурбан.
На гуьрчегвал гузва Каспи гьуьлуьзни,
Зазни кеф я къе, зи бахтлу хуьруьзни,
Ракъини хьиз экв гуз мичIи йифизни,
ЭкъечIзавай экуь гъетрез къурбан.
Ви культура — дагълар кукIва рагъ хьана,
Дагъдин ценер битав майвад багъ хьана.
Бегьер битмиш хьана уьмуьр чагъ хьана,
Ви Сулакдин вацIун эквериз къурбан.
Зегьметчийриз гана бахтлу уьмуьр на,
РикIера шадвилин эквер куькIуьрна.
Ватандикай азад женнет туькIуьрна,
Гьа ви гатфар атай рекьериз къурбан.
«Лезги газетдин» 2018-йисан 41-нумрадай
