Наида Рамазанова

Квадардач за

Гзаф чIехи я чи Ватан,

Пара я лап чIаларни.

Зи лезги чIал я заз масан,

Хайи чилин накьварни.

 

Гзаф чIехи я чи Ватан,

И кьил, а кьил авачир.

ЧIал гадардай ахмакь инсан

ТIаб я лувар кумачир.

 

“Лезгинка” кьуьл акур бере,

Хар акъатда зи чандиз.

ЧIал гадармир гьич са зерре,

Хас тир лезги инсандиз.

 

Зи дидеди нек ганай заз,

Лайлай ягъиз гьевесдалд.

Зи лезги чIал квадардач за

Эхиримжи нефесдалд.

 

Дагъустан

Сергьятламиш авур кьакьан дагълари,

Са пай гьуьлуь кьунва, са пай багълари.

Къанни цIикьвед чIалан дуст тир халкьарин

Вун гьикьван я рикIиз чими, Дагъустан!

 

Ви хизанда ава викIегь игитар.

Агъсакъалар — дегь девиррин шагьидар.

И дуьньядал виридалай багьа тIвар,

Вун гьикьван я рикIиз чими, Дагъустан!

 

Гьар са карда адалатлу, загьир тир,

Пешекарар авазва вахъ магьир тир.

Гьам зегьметдин кIвенкIвечи, гьам шаир тир,

Вун гьикьван я рикIиз чими, Дагъустан!

 

Дагълар, вацIар, багълар, къацу дугунар,

Гьар миллетдин шад авазар, рахунар,

Хас авунвай икьван гуьрчег акунар,

Вун гьикьван  я рикIиз чими, Дагъустан!

 

Дагъустандин  дишегьли

Гьар са кIвале шадарзавай гуьгьуьлар,

Дагъустан, вун багъ я кьунвай цуьквери.

КIантIа яшлу, кIандатIа чи жегьилар,

Яшамишрай Дагъустандин дишегьли!

 

Гьар са кIвалах гъиляй къведай,  алакьдай,

Чидач, жедач лугьун тийир гаф ерли,

Эркекри хьиз, зарбачи яз кIвалахдай,

Яшамишрай Дагъустандин дишегьли!

 

Гьар са кIвалин лампадин экв, гуьзгуь тир,

Гьар гьамиша гьам жуьрэтлу, гьам ферли,

Гьунарризни пара кьадар чIехи тир,

Яшамишрай Дагъустандин дишегьли!

 

Дидеяр я, гьар баладин вил алай,

Зегьмет пара чIугвазва куь гъилери.

Чи гьар садан кьилел хъуьтуьл гъил алай,

Яшамишрай Дагъустандин дишегьли!

 

Гьам диде тир, гьам юлдаш тир, гьам вах тир,

Гуз гьазур я ваз теменни теселли,

Элдин намус, берекат, гьам дамах тир,

Яшамишрай Дагъустандин  дишегьли!

 

Я дуьнья…

Алукьнамаз гуьзел гатфар,

Агал хьана школаяр,

Телефонрай чириз тарсар,

Я дуьнья, ваз вуч хьанватIа?

 

“ЧкIанва дуьньядиз азар”, —

Къвезвайди ваз я и хабар.

Вири халкь, кутIунна кIуфар, —

Я дуьнья, ваз вуч хьанватIа?

 

Агалнава вири рекьер,

Ийиз тазмач я мел-мехъер,

Ахъа дустагъ хьанва кIвалер, —

Я дуьнья, ваз вуч хьанва жал?

 

Я кIвалени къвезмач кьарай,

Кьил акъатзамач йикъарай,

— ЭкъечIмир! — лугьуз я гьарай, —

Я дуьнья, ваз вуч хьанватIа?

 

Аламатдинд ялда и тIал,

Гьелекзавай чIехид, аял,

Расалмиш тахьурай ам чал, —

Я дуьнья, ваз вуч хьанватIа?

 

Им дяве я, яракь гвачир,

Халкь телефдай, тахсир квачир.­

ГалукьайтIа, чара (а)мачир, —

Я дуьнья, ваз вуч хьанватIа?

 

Я жив амач, хъуьтIуьн бере,

Шадвал амач хуьре — кIвале,

Межлис амач, хунча — гъиле, —

Я дуьнья, ваз вуч хьанва жал?

 

Тарар кьураз. Машмаш, шеф­тел­,

Гьикьван бул тир чебни эвел,

КIвахьна жедай абур чилел, —

Я дуьнья, ваз вуч хьанватIа?

 

Идлай кьулухъ къвезмай вах­тар,­

Вири халкьдиз хьуй сагъ чанар,

И чаз акур залан йикъар,

Садрани мад тахкурай чаз!

 

Багъри газет

Гьар са кIвалин багьа мугьман,

Ви хабаррал я чун гьейран,

Вун я халкьдин руьгьдин девлет,­

Чаз играми “Лезги газет”.

 

Ачухайла ви гьар са чин,

Хабар жеда чаз уьлкведин,

Агъсакъал, авачир къимет,

Чаз играми “Лезги газет”.

 

Дагъдикайни арандикай,

Гьар камаллу инсандикай,

Лап эбеди абрун зегьмет

Къалурзавай “Лезги газет”.

 

Шарвилидин тур хьиз хци,

Хциди я къелемни ви,

А ви яшдиз ийиз гьуьрмет,

Гьазур я чун “Лезги газет”.

 

Эгер инсан ятIа лезги,

Чандик лезги кватIа иви,

Жуван халкьдиз ийиз гьуьрмет,

КIела, кхьихь багъри газет!

 

«Лезги газетдин» 2021-йисан 9-нумрадай

_____________________________________________________________________________