Дидедин чIал

 

Чан зи хайи дидедин чIал,

Валай масан затI ава жал?

Агъзурралди дуьньяд амал

Ваз муьтIуьгъ я, дидедин чIал.

Халкьдин акьул, халкьдин девлет

Эвелни-эвел вун я, гьелбет,

Рахаз регьят ширин шуьрбет

Вун я, хайи дидедин чIал.

Яд хьиз мецел къведа гафар,

Герек къведач кхьей дафтар,

Гьар садакай гафун устIар

ТуькIуьрда на, дидедин чIал.

Кьве келима рахун кумаз

Регьят жеда чандиз — жуваз,

Къваз тавуна мадни рахаз

КIан жеда заз, дидедин чIал.

Межлисд юкьвал герек я вун,

Тамададиз куьмек я вун,

Намус хуьниз зирек я вун

Гьамишанда, дидедин чIал.

Къариблухда хьайитIани,

Вахт атана, кьейитIани,

Агъзур йис мад фейитIани,

РикIелай фич дидедин чIал.

“Лезги газет” — чIалан булах,

Лезги халкьдин асул даях,

Мад девлетлу ийиз алахъ

Зи рикI алай дидедин чIал.

 

КицIин кьинер

 

Дагъустандин кьакьан дагъдин дере тир,

Чил-цав вири муркIад кьунавай бере тир.

Куьчедавай язух кицIиз  мекьизвай,

Къвал муркIадал алкIана, лап рекьизвай.

“Им уьмуьр туш, куьчеда чан акъатиз,

Къенин-къалди жувахъ са кIвал авачиз,

За, текьена амукьайтIа, цIи гатуз

Лап рикIивай кIвал эцигда чарасуз”.

Гад атайла, хъуьтIуьн мекьер акъатна,

Кьур кьинер кицIин рикIелай алатна.

Халкь — кIвалахдал, кицI сериндик къаткана,

Вахт акъудна, гьакI куьчейра  аткана.

Гад акъатна, мад сефер кьуьд атайла,

Живед кIаник къаю лап рикI  атIайла,

КицIи куз-куз вичин кьинер тикрарна,

Къведай гатуз кIвал эцигун икьрарна.

КицIин уьмуьр икI, кьинер кьаз, физава,

Амма халкьдиз адан хесет чизава.

Къенин къалди кицIихъ я са кIвал хьанач,

КIвал амукьрай, я са далда — цал хьанач.

Уьмуьрлухди ихьтин кьинер кьадайбур,

Хиве кьур кар, тамам тийиз, тадайбур

Чи арада авачиз туш, кими жеч,

Яшиндани адаз я кIвал,  чими жеч!..

 

«Лезги газетдин» 2021-йисан 9-нумрадай

________________________________________________