Чи миресдиз
Мирес, вуна ички хъвамир,
Вун хьи луьл пиян жезава.
АцIана физ, буш жибин гваз
Хквез, кIвале къал жезава.
Хъвайи кьванди хквез сивел,
ПIуз сарав кьаз, ярх жез чилел,
Шит рахунриз, нагъв къвез вилел,
Ви чанда на тIал твазава.
ЧIехидаз гьич гузамач яб,
Дуьз гаф чизмач, рахун я таб,
Ви гуьгъуьна аялни паб
Акваз, чи рикI тIар жезава.
Инсан я вун, гъавурда гьат,
И гафар ваз ван жезава.
Лугьудай кьван чи миресдиз
Зи мез, Аллагь, лал жезава.
Пис папан хесетар
Пис паб гъимир. Герек туш,
Ада ви тIвар русвагьда.
Вахтсуз чIарар жез лацу,
Вун абурдай аватда.
Пис папа, ваз авайди
Авач лугьуз, ван твада.
Авур хъсанвал вуна,
Унач лугьуз, къал твада
Ви кIвал, хизан нин патав
АгатайтIан жакьвада.
Мердимазардин вилиз
Хъсанди пис аквада
КIвале хьайи ихтилат
Куьчедай ваз ван жеда.
Шумуд кIвализ чарадан
Адакай мугьман жеда.
Дуьз рекьел ви тIвал гъида
Зегьерлу а иланди.
Физ маса гуз, вахъ галаз
Душманарда жуванди.
За лугьузва квез, дустар,
Гьич кIан жемир и жуьре.
Вуч адаз авуртIани
Акьул тваз жедач кьиле.
Интермедия
Гьасановрин колхоз
(Вичин кабинетда столдихъ ацукьна Гьасанов са квел ятIани машгъул я. Къецелай хъуьчIуьк папкани кваз са мугьман гьахьда)
Мугьман — Салам
Гьасанов — Алейкумсалам.
Мугьман — Куьне багъишламиша, вун и колхоздин председатель юлдаш Гьасанов яни?
Гьасанов — Ваъ, председатель зи амле я. Зун экономист Гьасанов я.
Мугьман — Зун къе мад и гьаятда са Гьасановал гьалтна эхир. Куь колхоз вири Гьасановринди яз тахьуй гьа?
Гьасанов — Ам чи муькуь имидин гада Гьасанов я. Чахъ са вах Гьасанова мадни ава.Белки, вал гьалтайбур гьабур я жеди.
Мугьман — Гьабуруни и колхозда кIвалахзавани?
Гьасанов — Эхь. Гада суьрсетрин складчи, вахни кассир я.
Мугьман — Огьо!.. И колхоздин тIварни Гьасанов эхцигнайтIа, гьикьван “гуьзел” жедай…
«Лезги газетдин» 2020-йисан 21-нумрадай.
