Шкьакьвал
Къенберни Кьасумбег Дербент шегьердиз акъатнавай. Чпин дердияр авурдалай кьулухъ, гишинвал алудун патал са ресторандиз гьахьда абур. Хъсандаказ тIуьна, хъвана, кефли гьалдиз акъатнавай. Кьасумбегаз ихьтин чка ахварайни бажагьат акунвай. Лугьунрай, адаз шкьакьвал хас я.
ТIуьн-хъунрин гьакъи гайидалай кьулухъ, кефли гьалда авай Кьасумбег садлагьана дегиш жеда. Вич лугьумир, дустарай хъсандаказ пул акъатнавай. Багьа, тIямлу затIар тIуьрла, гьелбетда, гьакъини гзаф акъатда. Вични ресторанда!
— И азгъунри чи хамар хтIунна хьи! Ибур вуч къияматдин къиметар я? — наразивал винел акъуд тавуна эхиз хьанач Кьасумбегавай.
— Бес ваз гьавайда кIанзавайни?
— Ваъ, Къенбер, абуру авур и акьалтIай регьимсуз кар за гьакI тадач. Аквада ваз!
— Вуна вуч ийида, вахчудани пул? — сивик хъвер кваз, хабар кьуна Къенбера.
— За нянрихъ са затIни хъинедач. Пул жибинда амукьдайвал, — хълагьна чара атIай шкьакьди.
«Лезги газетдин» 2020-йисан 19-нумрадай.
___________________________________________________________________
Гьеле обоярни…
Къенбера вичин цIийи кIвал эцигзавай устIар Кьасумбегалай наразивалзава:
— Яда, икI жеч эхир, им гьина авай къайда я?
— Вуч хьанва? Захъ къанни ирид йисан тежриба авайди я, — иесидин тажубвиляй кьил акъатнач устIардин.
— И цлар икьван шуькIуьбур вучиз я?
— Вуна акI лугьумир, гьеле обоярни алкIур хъийизвайди я.
Тафават
— Зун къенин девирдин Стlал Сулейман я, — такабурлувилелди тестикьарна Кьасумбегаз фадлай чидай са тупlал шаирди.
— Ваз гаф авач! Амма и арада зи рикlел чилинни цавун арада авай тафават хтана, — хълагьна Кьасумбега.
«Лезги газетдин» 2020-йисан 23-нумрадай.
____________________________________________________________________
Коронавирусдикай мезелияр
Дуьнья тирвал коронавирусдин тIугъвал чкIанвай муддат я. Саки вири инсанри махсус маскаяр алукIнава. Къенбера Лезгистандин дагълух хуьре яшамиш жезвай Кьасумбегавай телефондай ана гьалар гьикI аватIа хабар кьазва:
— Инра вирибуру маскаяр алукIзавайди я. Хуьруьнвийри алукIзавани?
— Эхь, — жаваб гана Кьасумбега, — алукIзавайди я дагъвийри маскаяр, сваркаяр ийидайла.
* * *
Шарафудин вичин чандихъ игьтиятлувилелди гелкъвезва: коронавирусди инсанар акIажарнавай йикъара адан чинилай маска садрани кими хьанач. И кар кьатIай Кьасумбегавай суал гун тавуна акъвазиз хьанач:
— Шарафудин, вуна маска садрани хтIун хъийизмайди тушни?
АтIада са кIусни энгеларнач жаваб:
— Эхь, хтIунзавайди я, анжах фу недайла.
* * *
Коронавирусди агъавалзавай йикъара Кьасумбега маскаяр къачун патал аптекадиз фин кьетIна. Фейивалди, ракIарал алкIурнавай малуматда вилер акьуна: “Маскаяр алачиз къенез гьахьун кIевелай къадагъа я!”.
Эхиримжи пуд гаф кьведра тикрарайдалай кьулухъ:
— КIевяй куьн гьич акъат тавурай, мердимазарар, гьарамзадаяр! Ам гьеле къачуз тахьанвайла, гьинай гъана акьалжзавайди я чинал?!
«Лезги газетдин» 2020-йисан 26-нумрадай.
