Лезгиятан дафтардай
Шагьпазова Лезгият Умрудиновна 2003-йисуз Кьурагь райондин Гелхенрин хуьре дидедиз хьана. 2020-йисуз юкьван мектеб къизилдин медалдалди акьалтIарна, ДГУ-дин филологиядин факультетдик экечIна.
Гьеле гъвечIи классра кIелзавай чIавалай Лезгият шиирар ва макъалаяр кхьинал машгъул хьана. Адан эсерар райондин «Дагъдин булах» ва республикадин «Лезги газет» газетриз мукьвал-мукьвал акъатзавай.
Алай вахтунда чешнелу студенткади лезги ва урус чIаларалди шиирарни макъалаяр кхьин давамарзава, вичи кIелзавай факультетдин пресс-къуллугъдин регьбердин везифаярни тамамарзава.
Къейд ийин хьи, алай йисан эвел кьилера Махачкъалада Алкьвадар Гьасанан тIварцIихъ галай центради ФЛНКА-дихъ галаз санал лезги публицистикадай кьиле тухвай конкурсдин гъалибчини Лезгият Шагьпазовадикай хьанай.
Алакьунар авай рушахъ мадни еке агалкьунар хьун чи мурад я. Агъадихъ чна газет кIелзавайбуруз Лезгият Шагьпазовадин эдебиятдин дафтардай къачунвай кьве шиир теклифзава.
______________________________________________________________
ЧIаларин бике
Гьар манайрин гафарикай
Халича хьиз хранвай,
Эминанни Сулейманан
Гафарганда чранвай.
Дидед лайлай, вацIун шуршур,
Шагьвардивди къугъвазвай.
Зи туьтуьнай акъатдайла,
Кагьраба хьиз аквазвай.
Зи багьа чIал, зи масан чIал,
Шарвилидин турдин ван.
Диде кьван вун заз багьа я,
Зи чан кьван вун заз ала я.
Гьакьван дерин, гьакьван ширин
Келимайрив ацIанвай.
Зи чIалак заз кутун кIан туш
Зайиф гафар кьацIанвай.
Ери-бине чир жезвач ви,
Ви ван гьинай къвезватIа.
Ширшир яни, хиял яни.
Гафар гьикI ваз жезватIа.
Зи масан чIал, ви гужлувал,
Шарвилиди кьатIанай.
Къванцин гадад Тимуран рикI,
Жидади хьиз атIанай.
КIантIа мах хьуй, кIантIа — мисал
Гьарма сад са гевгьер я.
Зи лезги чIал, зи масан чIал,
Лезгистандин бегьер я.
Гьуьлерилай дерин я вун,
Ви сергьятар еке я.
Зи багъри чIал, зи мез, зи сес,
Вун чIаларин бике я!
Куьн зулув вердиш жеда
Алукьна чаз цIинин зул,
Гатун девран къакъудна.
Зегьметчийрин пелерай
Ада гьекьер акъудна.
Бязи къушар хъфена,
Мукар ичIи хьанава.
Пичини хьиз хам кудай
Йикъар гила къанава.
Йифер физва яргъариз,
Йикъан са пай къакъудна.
ДакIар гатаз, пешери
Зун ахварай авудна.
Цуьквер амач чуьллера,
Кьуру кьалар хьанава.
ЦIарцIар гузвай гуьнед пел,
Къе ракъини канава.
Гатуз акур шикилар,
Зулухъди дегиш жеда.
КичIе жемир, аялар,
Куьн зулув вердиш жеда.
«Лезги газетдин» 2023-йисан 24-нумрадай.
