Гъалибвилин чIехи сувар
Гъалибвилин чIехи сувар,
Мягькем авур халкьдин лувар,
ЯхцIурни вад йисан гатфар,
Чи тарихдин рагъ я хьи вун.
Яракь кьуна гужлу гъиле,
Руьгьдин къуват — даим рикIе,
Диде-ватан четин бере,
Къаних душман туна чиле.
Чапхунчийрин акъатай вил,
Къирмишиз кIан хьана чи чил,
Эхирдай чеб, агъузна кьил,
Есирвилиз аватнай хьи.
Цавай чилел гуьллейрин хар,
Ватан хвейи игитрин тIвар,
Гьар са касдин накъварин пар —
Гъалибвилин чIехи сувар.
Сталинграддин гьар са кIвале,
КичI чир тахьай Брестдин къеле,
Ленинграддин каш-мекь къене
Чи рикIерай акъатдач гьич…
Москва хвейи кьегьалрикай
ВикIегьвилиз авач куь тай,
Курскдин вилик — женгерин цIай,
РикIел хкин гьар садан тIвар
Кавказдин вар ахъай тавур,
Агъзур шегьер азад хъувур,
Рейхстагдал — пайдахдин нур,
Чи халкьдин дамах я хьи вун!
Шумуд игит, эцигна чан,
Терг авуна душмандин тан,
Азад хъийиз гьар са инсан,
Гъалибвал къачунай хьи.
АлатнатIан шумуд йисар,
Эбеди тир цIаюн нурар,
Баркалладин зурба гьунар —
Гъалибвилин чIехи сувар!!!
«Лезги газетдин» 2023-йисан 19-нумрадай.
____________________________________________
Ватандин дад
Хайи чилихъ хьунвай мукьва
Чанда гьатда гьевесдин гар,
Рагъ экъечlна рикlин юкьва,
Кьезил жеда гъурбатдин пар.
Сивел къведа шадвилин хъвер,
Хайи чlалал рахайла эл,
Рикlел фида хтай рекьер,
Кам вегьейла хайи чилел.
Пакам кьиляй алмасдин чиг,
Рагъ вичелди къачузвай,
Цуьк акъатай дагъларин ник,
Вилер яргъаз тухузвай.
Дагъдин кlане муркlадин яд,
Гъилер вичел чlугвада фад,
Цавун аршда такабур кард,
Чарх ягъиз ам гьазур я мад.
Дуьзенлухдин емиш багълар,
Цlар-цlар хьана гуьрчегзава,
Берекатдив ацlай калар
Дагъдилай за гуьзетзава.
Пелез чкlай чlижер кlвалер,
Хуьр кутунва яйлахда,
Михьи целай акъваз тежез,
Элкъвезва чеб булахдал.
Зарбдиз виняй къачуна ван,
Вацl катзава, рагар атlуз,
Живед кукlвал кутуна кlан,
Акъатнава ам лап цавуз.
Каспий гуьлуьн лепейрин нур,
Ракъини захъ элкъуьрзава,
Яр галукьай рагарин хур,
Гужлу экв хьиз куькlуьрзава.
Лекь къекъвезва цавун къене,
Чил дикъетдив гуьзетзава,
Ахтармишиз кlамун бере,
Амалдалди гьуьжетзава.
Вил гьи патахъ вегьейтlани,
Кьуд пад цуьквед яйлахдава,
Зун гьи рекьяй фейитlани,
Тlебиатдин къужахдава.
Яргъаз фейи кlвачин рекьер,
Куь кьил гьина чуьнуьхнава,
Чархун юкьвай aтlуз гелер,
Цифер чпиз муьтlуьгънава.
Гекъиг жедай авач вахъ затl,
Вуч хуш жеда Ватандин дад,
Дарихвилин шумуд са къат,
Вун акурла, хьана азад.
Дагъ гьикьван хьайитlани тик,
Нефес къачуз кьезил жеда.
Са сеферда ацукьай рикl —
Ватан такваз сефил жеда!
«Лезги газетдин» 2023-йисан 31-нумрадай.
